ICT department hmalaknate thlirho
Information and Communication Technology (ICT) minister Zodintluanga hoin nimin khan a pisaah ICT department hnathawh thlir letna hun hman a ni a; ICT Secretary leh officer dangte an tel. Network project bika ICT hmalakna te, Mizoram district hrang hrang dinhmunte an sawiho.
ICT department hian network project hrang hrang a nei a, Central project pathum an nei. Central project Universal Service Obligation Fund (USOF) hnuaia district leh block headquarters thlunzawmna tur, Bharat Net an kalpui a; chutah chuan optical fibre hmang tura ruahman a ni.
Sorkar thuchhuah tarlan danin, sorkar laipuia Department of Telecommunications chuan Airtel kaltlangin tower 246 sa turin ruahmanna a siam tawh a, hna thawh mek niin, tower sakna tur hmun 133 enfel a ni tawh. Bharat Net leh USOF atan hian RD block 13-ah hna thawh ṭan tawh a ni a, thingtlang khaw tam taka inbiakpawhna ṭha zawk leh internet chak zawk a thlen beisei a ni.
State project-ah hian NEDP hnuaiah Aizawl leh district capital hrang hrang bakah district headquarters chhunga office inthlunzawmna leh inbiakpawhna changtlung tak (wireless) project kalpui a ni a; NEDP hnuaia project chu Mizoram State e-Governance Society (MSeGS)-in an buaipui.
North Eastern Council hnuaiah Aizawl tih loh district khawpui pasariha office hrang hrang internet connection pekna tur hna kalpui mek a ni a; Mamit, Kolasib leh Serchhipah khawl bun a ni tawh a, district dangah pawh chhunzawm zel tum a ni bawk.