Mobile polling stations van vailiam

Siaha district chhunga polling station tina vote thlak pawimawhzia zirtirna tur, mobile polling stations van chu nimin khan Siaha district Election officer B Malsawmtluangi'n DC office complex aṭangin a vai liam.

B Malsawmtluangi chuan, kumina Mizoram inthlanpuiah EVM leh VVPAT hman tur a nih thu sawiin, "Heng khawl hmang hian vote thlaktuin a vote ngei kha khawlin a chhinchhiah a ni tih a hmu thei tawh dawn a ni. India khua leh tui kan nihna angin vote thlak hi kan tih tur a ni a, mi dang zirtirna kawngah pawh theihtawp kan chhuah a ngai a ni," a ti.

Mobile polling stations van hian Siaha district-a polling station zawng zawng a tlawh chhuak dawn a, polling station tinah mipui hnenah EVM hmanga vote thlak dan an zirtir dawn a ni. Siaha district-ah hian polling station 79 a awm a, mobile PS van hian ni 40 chhungin a tlawh chhuak dawn a ni.