JNU zirlai leh zirtirtute beih duh lohna lantir

Misual hmaituamte'n January 5, 2019-ah Jawaharlal Nehru University (JNU), Delhi campus luhchilha zirlaite leh zirtirtute kut an thlâk duh loh lantir nan JNU Alumni, Mizoram chuan nimin khan Vanapa Hall kawtah lungawi lohna an lantir a, thuziak chi hrang hrang an keng.

JNU Alumni, Mizoram hruaitute chuan, JNU-a thil thleng chu duh lo viau mah se, tih theih erawh an neih tam loh thu sawiin, "Hmarchhak state kil takah hian JNU thlavâng hauhtu an awm ve tih lantir kan duh. Mizoram aṭanga JNU-a chhuakte hi mumal zawkin kan inhlâwm khâwm ang. Tunah chuan hmun hrang hrangah kan awm darh a, sorkar hna pawimawh tak tak chelh lo tel ve remchang chiah lote pawh an awm," an ti.

JNU-a kal mek Lawmsangzuali chuan Vanglaini palai zawhna chhangin, JNU-ah hian Mizo zirlai 18 an awm mek thu a sawi a, "JNU beih a nih lai hian mi 10 vel an awm a, hliam tuar an awm lo. Mahse, an thlaphàn avangin campus páwnahte an tlan chhuak a ni," tiin, Mizo zirlaite chu an thlabàr viau thu a sawi.

Lawmsangzuali hi JNU Students Union leh Northeast Students Forum ṭangkawpin December 23, 2019-a Citizenship Amendment Bill (CAA) duh loh lantirna an neih ṭumin Delhi Police-te'n an man a, an lawyer leh mi dangte puihnain chhuah leh a ni. JNU beih laia campus chhunga awm Janelli Vanlalrinpuii chuan Vanglaini palai zawhna chhangin, an awmna hmun Girls Hostel chu beih a nih loh thu a sawi a, "Security guard-te an tlânchhia a, kan inkalh khum a, zankhuaiin kan awm. Campus chhunga awmte chu a tûkah Delhi  Police-a Mizo awmte'n an la chhuak a, Mizoram House-ah an hruai a ni," a ti. 

JNU-a Mizo zirlaite sawi danin, JNU thuneitute nen fee leh thil dang chungchangah hun eng emaw chen an intithiam lo tawh a, chu vang chuan university thuneitute'n BJP zirlai pawl ABVP nia hriatte an ruai a nih rin a ni. Misualte'n campus an luh dawn lai pawhin a bul velah police an awm reng a, mahse, police-te chuan an dang lo. JNU Alumni, Mizoram chuan thuchhuah siamin, ABVP mi leh sa nia hriatte'n dîm lo taka JNU zirlaite leh zirtirtute hmanraw keng chunga an beih dan chuan an thin a ṭhàwn thu an tarlang a, "JNU chhunga khawsa mi tam tak rilru leh taksa na taka hliama an chêt duh dan hi na takin kan dem a ni," an ti a; tharum thawha hmanrua nena inbeihna chu ram chhung zirna-in dangah pawh a thlen thu an sawi.

Zirna-in beih a nih chhan chu mi ṭhenkhat, sorkar laipui thuneitute laka tlatlum tlemtêin university leh zirbingna hmun sang zawktea democracy  leh zirmite zalenna rahbeh leh páwngnêk an tumna a nih thu tarlangin JNU Alumni hruaitute chuan, "JNU hian democracy ram kan nih anga Indian Constitution innghahna lungphûmte hi chawisangin a vawng nung reng ṭhin a ni," an ti.