ZPM-in sawifiah turin Home Minister phût

Zoram Peoples' Move­ment (ZPM) Ṭhalai chuan, social media-ah Chief Minister hnena open letter thawn vanga man, Rodinliana (Apuia Tochhawng), Khawzawl Hermon Vengi chu police-in an man hnuah thubuai siamsakna tur an hmuh loh avangin an chhuah a, chumi hnuah man leh a nih thu an tarlang a; hemi chungchang hi sawi­fiah turin Home minister R Lalzirliana an phût.

ZPM Ṭhalaite'n ni­mina thuchhuah an siam danin, Rodinliana hi CM hnena open letter a thawn vangin Congress worker Lalhruaitluanga Bawih­tlung hmingin FIR theh­luh a ni a, chuvang chuan Rodinliana chu man a ni. Man ni mah se, a lakah thubuai siamsakna tur thu tling an hmuh loh vangin police-te'n an chhuah leh nghal niin ZPM ṭhalai chuan an tarlang.

Congress party-a tlâktlum tum zualte hmalaknain Rodinliana lakah FIR thehluh nawn leh a ni tih sawiin ZPM Ṭhalai chuan, "Eng eng dan emaw rem leh rem loa tlawhchhanin man leh a ni a, chu an dan tlawhchhan hmang chuan bail theih lohin Aizawl lamah rawn hruai thlak a ni," an ti a; dan tlawhchhan inang reng, a ṭhen FIR thehluh pawm a, a ṭhen pawm duh loh chu rorelna chu hriatthiam harsa an tih thu an sawi.

ZPM Ṭhalaite chuan, "Apuia Tochhawng chung­changah hian a hmaa Home Minister kan zawhna ngai bawk, mimal zalenna hi kan thuneihna hmansual hmangin rah­behsak a ni em tih leh, kan police chak takte kut hi an duh záwngah chauh em ni an phuar loh tih hi sawifiah ngei turin kan phût a ni," an ti.