Bru hruai kir chungchangah MHA hotute an lo kal dawn

Tripura relief camp-a Mizoram Bru-te Mizorama hruai kir chungchanga hmalakna leh thil pawimawhte enfiah turin, Ministry of Home Affairs (MHA) hotute chu Mizoramah an rawn kal leh dawn.

Vanglaini palai zawhna chhangin Home minister R Lalzirliana chuan, Bru hruai kir hna chu chawlhsan rih a nih thu a sawi a, "Tun hnaia hruai kîr hna thawh laia rawn kîr chhungkaw pathumte chhawmdawlna pek dan tur ngaihtuah pahin, thil pawimawhte rawn ti turin sorkar laipui hotute an rawn kal leh dawn. Chumi hnuah hmalak zel dan tur a hriat ang," a ti.

Home Minister chuan, Bru-te'n harsatna an siam lohna atan ramrî-ah venhim hna kalpui uluk a nih thu a sawi a, "Hruai kîr hna thawh a nih theih lohna atana Mizorama lama harsatna rawn siam tum a awm thei a, hei vang hian ramria police duty-te chu ngawrh lehzuala duty tura hriattir an ni," a ti a; tluang tak leh ṭha takin lak let hna kalpui an duh thu a sawi.