Mamit DC sawn chhuah phûtin NGO-in vawiinah kawngzawh dawn

Mamit DC Bhupesh Chaudhary sawn chhuah phutin YMA sub-headquarters, Mamit bultumin vawiin hian Mamitah kawng zawh a ni dawn.

Mamita tlawmngai pawl (NGO) leh political party zawng zawngte chuan chu DC hi Mamit aṭanga sawn chhuah an phût a; kawngzawhnaa tel tur leh a ṭul anga hma la turin Central YMA hruaitute pawhin an president Vanlalruata hoin nimin khan Mamit an pan.

Mamit sub-hqrs. YMA kaihhruaia nimin zinga Mamita NGO leh political party zawng zawngte ṭhukhawm chuan, Bru lâk let chungchanga ruahmann awm sa tibahlah thei Election Office rawk chungchangah Bhupesh Chaudhary chu DC a nihna anga office hi venghim zo loah an puh a, Mamit aṭanga Bhupesh Chaudhary a chhuah theihna atan hmalak an rel.

Meeting chuan, Bru-te chu an duhthu ngeia Mizoram chhuahsan an nih thu leh, Mizoram khua leh tui dik tak chu Mizoramah lo kir ngei se tih chu Mizo mipui duh dan a nih thu an tarlang a, "Hetih laia DC Office compound chhung ngeia mi office rawk a ni thei hi âwm lo kan ti hle. Mizoram All NGO-in a remtih loh Bru camp-a electoral roll revision neih a nih theih nana DC-in hma a la reng mai hi Mizo mipuite zah lohna leh hmuhsitnaah kan ngai," an ti.

Nimin vêk khan Mamit sub-hqrs. YMA President hoin NGO hrang hrang president, district V/C President leh Joint V/C Chairman-te chuan Aizawl an pan a; chief minister Lal Thanhawla leh chief secretary Arvind Ray hnenah Bhupesh Chaudhary chu Mamit DC aṭanga sawn chhuak tura ngenna thehluh an tum. September 10, 2018 hmaa sawn chhuah a nih loh chuan a ṭul anga hmalak zel an tum bawk.

Hetih lai hian, CYMA hruaitute chuan vawiin kawngzawha tel tur leh a ṭul anga hma la turin nimin khan Mamit an pan a; CYMA president Vanlalruata chuan, Mamit DC Bhupesh Chaudhary-a'n Bru hruai kîr hna a tihbuaichuar an hlauh thu a sawi.

Vanlalruata chuan, Ministry of Home Affairs (MHA), Mizoram sor­kar, Tripura sorkar leh Mizoram Bru Displaced People Forum (MBDPF) ten inremna an siam angin, Tripura relief camp-a Bru-te chu lo kir se tih chu an duh dan a nih thu a sawi a, "Electoral roll revision ram páwna tih loh ni se kan tih laiin, Mamit DC-in hma thar a la zel a, hlawhtling taka hruai kîr hna thawh kan duh laiin, Mamit DC hian a tibuaichuar ang tih kan hlau a ni," a ti.

CYMA President chuan, boruak ṭha zawk a awm theihna atan Bhupesh Chaudhary chu Mamit DC-a a awm reng a ṭha dawn em ni tih chu an ngaihdan a nih thu sawiin, "Bhupesh Chaudhary hian boruak ṭha lo a siam kan hlau a ni," a ti a; a ṭul ang ang buai­pui turin Mamit an pan tih a sawi.

NGO Coordination Committee nimina Central YMA pisa ṭhukhawm pawhin, Bhupesh Chaudhary chet dan chu Zoram mipuite aiawh NGO Coordination Committee-te thuchhuak zahlohnaa an ngaih thu tarlang a; a rang thei ang ber a Mizoram chhuahsan turin an phût a ni.

Mamit DC an duh loh chhante
. Bru lâk let (repatriation) kal mek tikhaihlak thei tur office thil pawimawh venghim zo lo DC hi Mamita awm reng tlakah kan ngai lo.
. Mizoram NGO Coordination Committee-in a remtih loh Tripura relief camp-a elec­toral roll revision a hmuna kal chilha neih luihtir hi kan duh lo hle a, Mizo mipuite zahlohnaah kan ngai.
. Tripura camp-a electoral roll revision nei tura kalte thlithlaia August 18, 2018-a Zawlnuama kal Central YMA, MZP Gen. Hqrs,, MSU Gen.Hqrs., Mamit Sub-Hqrs. YMA, Taitesena Group YMA, Langkaih Group YMA leh Zawlnuam MZP hruaitute thil tihsual an nei lo chunga man tura thupek a chhuah hi Mizo mipuite hmuhsitna leh zahlohnaah kan ngai.
. Mamit district mipui amah dawrtute min hmusit hle.
. A hnuaia thawk staff-te hmu­sit tak leh déngkháwng tak taka a ṭawngkhum ṭhin hi minority community-te min hmuhsitnaah kan ngai.