KHAWTHLIR

Mitdelte zirtir
National Atlas & Thematic Mapping Organisation (NATMO) leh Indian National Cartographic Association (INCA) ṭangkawp chuan Kolasib-a Salvation Army Integrated School-a Visually Impaired Student-te pualin Thawhṭanni leh nimin khan 'Thematic Mapping leh National Quiz Competition' an buatsaih.

CM-in hawng
Serchhip Chanmari Venga Serchhip District Panchayati Resource Centre building sak thar chu, nimin khan chief minister Lal Thanhawla'n a hawng. Building hi a chhuat zau zawng square metre 400 a ni a, October 1, 2016-a sak ṭan, January 19, 2018-a sak zawh niin, a sak nan cheng nuai 148.55 sên a ni.

Bike chesualah thi
Thawhṭanni zan zanlai vel khan Falkland Venga Aizawl By-Pass Road-in NH-54 kawngpui a pawhna bulah Duke 200 bike a chesual a, bike khalhtu Aldrin Lalrinmawia a hmunah a thi. Thu dawn danin, chetsualna thleng hi mita hmu an awm lo a, bike hi amahin a chesual nge, motor dang nen an insû tih hriat chian a ni lo. Aldrin Lalrinmawia hi Home Mission School-a zirtirtu a ni.

JJ Act zirho
Mizoram State Child Protection Society (MSCPS) leh Social Welfare department chuan, nimin khan MSCPS Training Hall-ah 'Orientation training on the roles and functions of the district level inspection committee under the Juvenile Justice Act, 2015' an buatsaih a; Mizoram State Commission for Protection of Child Rights chairperson Sangzuali Vanchhawng khuallian a ni. Training-ah hian district tina District Level Inspection Committee (DLIC) member-te an tel.

Minister-in enfiah
PWD minister Lal Thanzara chuan nimin khan a bial, Aizawl North-III chhunga Edenthar Veng leh Chanmari West-a community hall sak mek a tlawh a, hna thawh dan a enfiah. Lal Thanzara chuan, Edenthar Veng leh Chanmari West-te'n hall ṭha tak an nei tur chu a lawmpui thu sawiin, khawtlang mipuite chu ṭangkai taka hmang turin duhsakna a hlan.