Central YMA leh Planning dept.-te buatsaih Mistiri training minister Sawta'n a hawng

Planning department leh Central YMA ṭangkawpin thla khat awh tur 'Training programme on Aluminium Works, Cement Works & Floor Tile Works’ chu nimin khan ṭan a ni a, CYMA Hall-ah Planning minister Lalsawta'n a hawng.

Training hawnna inkhawm hi CYMA Training & Youth Affairs chairman John Kima'n a kaihruai a; Lalsawta chuan, aluminium, cement leh floor tile phah thiam mamawhna sang hle mah se, Mizo zingah thiam an tlem thu a sawi a, "Mizote'n kan zir thar leh tur chu hna thawhna kawngah chapo lo taka min ruaitute thu­hnuaia awm thiam te, hna uluk bakah, taima tak leh rinawm taka sum senga min chhawrtute tana thawh thiam hi a ni," a ti.

Planning secretary Dr C Va­n­­lalramsanga pawhin thu sawi­in, "Mizo ṭhalaite hmasawnna tura hmalakna hrang hrangah CYMA hruaitute ṭhahnem­ngaihna a fakawm. Mizoram sorkar hmalakna pawimawh tak NEDP hnuaia entrepreneurship lama tui ṭhalaite chawikanna leh bul ṭansak turin MEDMOC-in hma a la zel a ni," a ti a; NEDP hnuaiah CYMA office thawm ṭhatna atan cheng nuai 200 dah a nih thu a puang.

CYMA president Vanlalruata chuan, Mizo Kristiante'n thu ṭha an ngaithla tam a, a zawm an harsat nia sawiin, "Insiamṭhat kan ngai hle. Mizoramah hna a váng kan ti a, sorkar hna hi a váng tawh a, chuvangin, ṭhalai lehkhathiam tak tak leh sumdawnna lamah pawh hawi zau tak takte an rawn chhuak zel a, heng atan hian sorkar hna tlem mah se, mahni kea din theihna tur kawng tam tak a la awm," a ti.

Training-ah hian aluminium work, cement work & floor tile work-ah seat 50 ṭheuh siam a ni a, training chhungin service provider hrang hrang hnuaiah zirtir an ni ang.