Politics khelh nana Education hmangah MNYF-te'n Congress hruai sorkar an puh

MNF ṭhalai, Mizo National Youth Front (MNYF) headquarters chuan thuchhuah siamin, Mizoram sorkarin zirna (education) chu politics khelh nan an hmang niin an tarlang.

MNYF chuan, tun hnaia School Education minister H Rohluna'n ‘Education hi politics khelh nan sorkarin kan phal lo’ a tih te, ‘MNF sorkar kihhnawk vangin kan buai’ a tih te, ‘An sorkar laiin ngati nge an siamṭhat loh,’ a tihte chu Congress tla tur chalchâng aw nia an hriat hu an sawi a; "Education hi politics khelh nana hmangtu chu Congress sorkar an ni," an ti.

Minister H Rohluna chuan tun hnaiah MZP hruaitute hmaah ‘In­thlan a hnaih tawh avangin zirtirtu sem rual kan ngam lo,' tiin a sawi tih sawiin MNYF chuan, "Zirtirtu transfer chung­changa a bialtu MLA-te thuneihna an pek pawh hi Education directorate kut phuarna a ni," an ti a; chu chu zirna hmanga politics khelhna a nih thu an sawi.

MNF ṭhalaite chuan, MNF sorkar laiin Education department-ah kihhnawk a nei lo nia sawiin, "A thenfai sa leh a siamṭhat sa chu Congress sorkarin an tichhe zawk a ni. MNF sorkar laia class I-VIII zirlaite tana zirlaibu a thlawna a sem te, ziakloh bu a thlawna a sem te, naupang tana chawchhun a thlawna a semte titawptu chu Congress sorkar a ni," an ti.

MNF sorkarin zirna siamṭhatna lamah nasa takin hna an thawk nia sawiin MNYF chuan, MNF sorkar laia zirna lama an hmalakna hrang hrangte an tarlang a, "Congress sorkar hian world class education thlentir a tum tak tak a nih chuan, MNF kum 10 sorkarin Education a kalpui dan kha entawn mai rawh se," an ti a; mipuite ngaihtuahna hruai­ kawi theih inbeiseia ṭawng mai mai lo turin School Education Minister an ràwn a ni.