Pawngsual duh loin Phullenah kawngzawh

Phullen MHIP chuan, an member pui, an khaw nula pakhat pawngsual an duh lohzia lantir nan leh pawngsualtu a na thei ang bera hrem an phût tih lantir nan nimin zing khan an khuaah kawngzawh an huaihawt a, mi ṭhahnem tak an tel.

Phullen Branch MHIP hruaitute hnen aṭanga thu dawn danin, Phullena Power & Electricity department-a thawk JC Sangzuala (34) s/o Zopui­liana, Phuaibuang chu nula pakhat nen Phuaibuang khuaah thlân siam turin bike-in an inphur a, Phullen aṭangin zan dar 8 velah an chhuak. Nula hi Phuaibuanga chhungte nei, JC Sangzuala nen pawha hla deuh hlek tawha inchhùnna nei a ni.

JC Sangzuala chuan Tuivai (Phuaibuang kái) thlen dawnah a bike chu a khalh thei lo nia sawiin thlámah a chawlhpui a, nula chu a sual ta a ni. Nula chu theihtawp chhuaha a lo indan ve bakah, pawngsual lo turin a ngen nasa niin an sawi. Thlám aṭanga Phuaibuang pana an kal leh hnuah Phuaibuang thlen hmain a pawngsual leh niin an sawi bawk.

Pawngsual tâwktu hian September 1, 2018-a an khua, Phullena a haw leh hnuah pawngsual a nih thu a sawi chhuak chauh nia thu dawn a ni.

Pawngsualtua puh JC Sangzuala hi September 2, Pathianni khan police-in an man a, Court thu angin Central Jail-ah dah luh a ni tawh niin Phullen MHIP hruaitute chuan an sawi.