Hriselna chungchang inzirtirna buatsaih
Social Welfare department (SWD) chuan nimin khan Aijal Club-ah hriselna chungchang inzirtirna, 'State Level Workshop on Poshan Maah' an buatsaih a, Social Welfare minister PC Lalthanliana khuallian a ni.
PC Lalthanliana chuan, SWD hnuaia Integrated Child Development Services (ICDS)-in kum tin September 1-7 chhungin 'Nutrition Week’ an hman ṭhin thu a sawi a, "Kuminah chuan September thla chhungin ‘Nutrition Month’ hman a ni dawn. National Family Health Survey Report-in a tarlan angin, India ram naupangte zingah sàn dan tur anga sáng lo an hmu chhuak nasa a, chaw ṭha tlâkchham vang niin, nausen lai aṭangin chaw pek ṭhat a pawimawh a ni," a ti.
March 8, 2018 aṭangin India ramah National Nutrition Mission ‘Poshan Abhiyan’ hman ṭan a nih thu sawiin SWD Minister chuan, "Mizoram chhunga district pahnih - Lawngtlai leh Siaha-ah Mission hi kalpui ṭan a ni tawh a, kum 2019-ah chuan district zawng zawng tuam vek tum a ni," a ti a; Poshan Abhiyan-in a tum ber chu - naupang leh nu nau paite bakah, nau pawmte hriselna tihhmasawn a nih thu a sawi.
National Nutrition Mission ‘Poshan Abhiyaan’ thil tum langsar zualte chu - community based education - anganwadi centre tinah khawtlang mipui zirtirna pek te, Village Health & Nutrition Day thla tina neih te, naupang san tur anga sang lo tuna 38.4% aṭangin 25%-ah tihhniam te, tui thianghlim in tur neihte leh hriselna dinhmun enfiahte an ni. Mission hi kum 2022 thleng awh tur a ni.