Chief Minister-in rangva a sem

Chief minister Lal Thanhawla chuan nimin khan Serchhip District PRC Auditorium-ah Serchhip RD Block chhung khaw hrang hranga Mizoram Rural Housing Scheme 2017-18 dawng tura thlante hnenah rangva a sem.

Lal Thanhawla chuan, kum 1989 vel aṭangin sorkarin a mamawhtu, rahbi tuksak ngai chhung­kuate hnenah rangva a sem ṭan tih a sawi a, "NLUP pawh a mamawhtu, mi khai chhuah ngai nia kan hriatte hnenah kan lo pe tawh ṭhin. Vawiin thlengin chu ṭanpuina chu he sorkar hian a la kalpui zel a ni. Ṭanpuinate hi kan sem ve ringawt a ni lo a, a mamawhtu, rahbi tuksak ngai tak nia kan hriatte kan ṭanpuiin kan tuamhlâwm ṭhin zawk a ni," a ti.

Ṭanpuinate dik taka hmangtute chu an awhawm tlangpui tih sawiin Chief Minister chuan, "Mi tam tak, mahni ta ngei ngei pawh eiru duh kan awm ṭhin hi a pawi. Vawiina Rural Housing Scheme 2017-18 aṭanga rângva dawngtute pawh a nihna ang taka hmang a, tangkai taka hmang turin ka ngen che u a ni," a ti a; ramin hma a sawnna kawngah mi tinin mahni tawkah mawhphurhna an neih vek thu a sawi.

Mizoram Rural Housing Scheme 2017-18 hnuaiah hian Serchhip RD Block huam chhunga village council 39 aṭangin chhungkaw 263-te'n rângva bundle 4 ṭheuh an dawng a ni.