ASF vanga vawk suat neitute Zangnadawmna pek theih beisei

African Swine Fever (ASF) avanga AH&Vety department-in vawk a suat neitute chu zangnadawmna pek theih ngei beisei a nih thu AH&Vety minister Dr K Beichhua chuan a sawi.

Vanglaini palai zawhna chhangin AH&Vety Minister chuan, ASF vanga vawk suat neitute’n zangnadawmna hmu ngei se an duh thu a sawi a, “Sorkar laipuiah theihtawp chhuahin kan nawr a, kan hlawhtlin ngei kan beisei. Beiseina sang tak nei mah ila, tun dinhmunah chuan zangnadawmna pek tur hi kan hmu ngei ang tih erawh kan sawi ngam lo,” a ti.

Dr K Beichhua chuan, State Disaster Respone Fund aṭang chuan kumin sorkar kum kal mekah chuan ASF vanga vawk chánte zangnadawmna pek tur an hmuh theih dawn loh thu sawiin, “Sorkar kum lehah kan dil leh dawn,” a ti a; ASF avanga vawk chánte an lainat tak zet thu a sawi.

ASF avang hian Mizoramah vawk 28,824 a thi tawh a, kuminah thi a la awm lo. ASF vang vêk hian mimal vawk vulh lai 10,381 suat a ni tawh bawk.