Mizoram Mobile I-Lab hawn a ni

Ministry of Science & Technology-in a thlàwna Mizoram hnena Mobile I-Lab (infectious disease diagnostic laboratory) a pek chu nimin khan Union minister of state for Science & Technology Jitendra Singh-a'n a hawng a, chief minister Zoramthanga a tel.

Zoramthanga chuan, Mizoramin Aizawl leh Lungleiah RT-PCR laboratory a neih bakah, district dangah pawh dah tuma ruahman a nih thu a sawi.

Mobile I-Lab (mobile RT-PCR lab.) hawnna hi online hmanga buatsaih a ni a; Chief Minister chuan, Mizoram chu international boundary pahnihin a kárcheh leh hmun kilkhâwra awm a nih thu sawiin, "Hripui léng pawh a rawn thleng tlai deuh hretin a hriat a, India ram hmun danga a lên nasat zualpui a reh hnuah min nuai ve leh ṭhin. Aizawl leh Lungleiah RT-PCR lab. kan nei a, district dangah pawh dah tumin ruahman a ni. Tun dinhmunah chuan Mobile I-Lab hian nasa takin min chhâwk dawn a ni," a ti.

CM Zoramthanga chuan, "Mizoram sorkar leh mipui aiawhin Mobile I-Lab kan neih theihna tura hma min laksaktute zawng zawng chungah lawmthu ka sawi a ni," a ti a; Jitendra Singh chu DoNER minister a nih lai pawha Mizoram duhsaktu a nih thu a sawi.

Jitendra Singh chuan, Mizoramin Mobile I-Lab a nei ta chu a lawmpui thu sawiin, "India hmarchhak chu hmun kilkhâwr leh inkalpawh zung zung harsatna hmun a nih avangin keini pawhin kan ngai pawimawh a, a bul ṭan nan Mizoram kan duhsak hmasa ber a ni," a ti.

Mobile I-Lab siamtu AMTZ (Andhra Pradesh MedTech Zone Ltd), Vishakapatnam managing director Dr JK Sharma tarlan danin, Mobile I-Lab hian ni khatah swab sample 50 vel a endik thei dawn a; HIV, TB leh natna dangte a endik thei bawk.

Hawnnaah hian Chief Minister hi Health minister Dr R Lalthangliana'n a ṭawiawm a ni.