Vehbûr khawnte laka fimkhur turin Mizoram Police-in mipui an chah

Mizoram Police chuan thuchhuah siamin, tunlaiin social media-ah ṭanpui ngaite ṭanpuina tura vehbûr khawn an tam tih an tarlang a, chutiang laka fimkhur turin Mizoram mipui an chah.

Vehbûr khawn chung-changah hian Mizoram Police chuan, “Mipui tan mi harsa leh vanduai zawkte puih theihna leh luan chhuahna remchang a nih rualin, inbumna bawlhhlawh tak thleng thei a ni tih hria a, fimkhur tur leh mi rintlak tih hriat chiante hnenah chauh ṭanpuina pe ṭhin turin mipui ngen an ni,” an ti.

Mizoram Police chuan, mi/pawl ṭhenkhatah phei chuan ṭanpuina pawisa (donation) petute tan an pek tam dan azirin lawmman ṭha tak tak dawn lêt theihna remchang (chance) awm ang hialin tarlan a ni ṭhin tih an sawi a; “Online transaction (Gpay, bank transfer, etc.) hmanga pawisa inthawn hi a awlsam a, mi bum chíngte (scammer) tan hmanraw remchang leh awlsam tak a ni thei,” an ti a; fimkhur turin Mizoram mipui an chah a ni.