Lungleia RT-PCR laboratory-ah swab sample endik ṭan a ni

Lungleia RT-PCR laboratory-ah January 19, Nilaini khan swab sample endik ṭan a ni a, sample 43 endik aṭangin Covid-19 positive 11 hmuh niin, endik zat aṭanga positive hmuh zat (positivity rate) 25.58% a tling.

Tarlan tawh ṭhin angin, Lunglei Zotlanga RT-PCR laboratory hi December 30, 2021 khan Health Minister-in a hawng a, ICMR-in January 13, 2022-a a pawmpui hnuah January 19 aṭangin sample endik ṭan a ni a; ni tin chawhnu dar 1 hma lama swab sample thleng hmante chu endik nghal a ni dawn a, chawhnu dar 1 hnu lama laboratory thlengte chu a tûkah endik tur a ni thung.

Hetih lai hian, Lungleia RT-PCR laboratory chungchangah hian Gauhati High Court, Aizawl Bench-ah thubuai a la awm mek a; Court chuan January 25, 2022 khian a ngaihtuah leh dawn a, January 1, 2022 aṭanga ni tina chhim lam district palia swab sample endik zat dik tak thehlut turin Mizoram sorkar a hriattir a ni.