Mizoramah mirethei 9.80% an awm

NITI Aayog-a Sustainable Development Goals (SDGs) adviser Sanyukta Samaddar leh a hote chuan nimin khan chief minister Zoramthanga chu a pisaah an kâwm a, SDG-a Mizoram dinhmun leh ṭan lakna turte an sawiho. Mizoramah mirethei 9.80% an awm thu tarlan a ni.

NITI Aayog Adviser chuan, Mizoramin SDG-a ṭan a lakna turte a tarlang a; NITI Aayog-in SDG-a hmarchhak state-a district 120 zinga district 103 a zir chiannaah, Serchhip leh Lunglei district chu SDG sáng district 10 zingah an tel.

National Multi Dimensional Poverty Index, baseline report-a a lan danin, India ramah mirethei (multi dimensionally poor) 25% vel an awm laiin, Mizoramah 9.80% an awm a; Lawngtlai district-ah 30.50% leh Mamit district-ah 25.29% an awm a ni.

CM Zoramthanga chuan, mihring dam khawchhuah nan SDG-te chu thil pawimawh tak nia a hriat thu sawiin, "Heng tehfung aṭang hian ṭan lakna turte chiang takin a lang ṭhin a, hmasawnna kawng hrang hranga kan dinhmun leh ṭan lakna turte state-te'n kan hriat bakah, state dangte nena kan tih ṭhat dan kan teh thei a ni," a ti.

SDG India Index 2019-20-a Mizoram dinhmun chu ram pumah 21-na a nih laiin, SDG India Index 2020-21-ah chuan 12-na a nih thu sawiin Zoramthanga chuan, "Ṭan lakna tur tam tak awm mah se, state-in kawng hrang hrangin hma a sawn tih a lang. Hmasawn zel tur chuan state economy siamṭhat leh mipuiin a taka an hlâwkpui a pawimawh," a ti a; Mizoramin hausakna a neih, a bikin thing leh maua hausaknate chu ṭangkai thei ang bera hman a ngaih pawimawh thu leh carbon trading lamah India-in a taka hma a lak vat a ṭul thu a sawi.

Chief Minister hi Planning secretary Lalmalsawma Pachuau leh sorkar hotute'n an ṭawiawm a ni.

SDG-a Mizoram ṭan lakna tur tarlan
 SDG-a goal pakuana - industry, innovation and infrastructure leh goal 15-na - life on land.
 Ei leh bâr leh chaw ṭha.
 Hmeichhiate dinhmun, a bikin an hriselna siamṭhat.
 Zirna, a bikin zirna sanga gross enrolment ratio.
 Zirtirtu trained a tam thei ang ber neih.