Luangchhuak

Armed Veng khawtlang chuan an veng Local Task Force hmalaknain Covid-19 hluarna khua pali - Hualtu, Bualpui V, Sekhum leh Sailam hnenah nimin kan ṭanpuina an hlân.

Armed Veng Local Council chairman K Lalfakzuala chuan, nikumah Covid-19 vanga harsatna an tawh laiin thingtlang aṭangin ṭanpuina eng emaw zat an dawn thu sawiin, “Tunah khawpui lam aiin thingtlang lama kan unaute’n hripui an tuar nasa zawk a, chuvangin, kan theih ang tawka chhawmdawl ve ṭha kan ti a ni. Véng lungrual kan nihzia a rawn lang chhuak a, kan lawm tak zet,” a ti.

Khaw pali hnenah hian tél, alu, dailuah, purun sen, bekang sa (neutrela), hmai tuamna, kut silfaina, hmun phuh faina (disinfectant), kutkawr leh Rs. 10,000 ṭheuh an pe a ni.

(Thlalatu : Lalrinngheta)