KHAWTHLIR

Thisen pe
Kolasib-a police-te chuan Mizoram Police kum 50 tlin pualin nimin khan Kolasib SP pisaah thisen pek an huaihawt a, District Hospital tan thisen unit 20 pein, petute mipa 15 leh hmeichhia panga an ni.

JERC member R Thanga la lut
Rengthanvela Thanga (R Thanga) chu Joint Electricity Regulatory Commission (JERC) for Manipur & Mizoram member atan nimin khan lak luh a ni. Lak luhna inkhawm hi video conferencing hmangin buatsaih a ni a, Union minister for Power RK Singh-a'n thu a tiamtir a ni. June 10, 1960-a piang R Thanga hi Zonuamah a cheng mek a; July 1988-ah SDM(J) a ni ṭan a, Gauhati High Court, Aizawl Bench-ah registrar a ni tawh a, Aizawl District & Sessions judge a nih laiin June 30, 2020-ah pension-in a chhuak a ni.

SBI-in hlân
Mizoram Police Raising Day vawi 50-na lawmpui nan State Bank of India chuan corporate social responsibility kaltlangin police hnenah Rs 3,00,000 an hlân. CSR hi SBI, Aizawl Branch assistant general manager Sheryl L Vanchhawng chuan DGP mawhphurhna la mektu IGP (Hqrs) John Neihlaia hnenah a hlan a ni.

LRS dept. infuih
Land Revenue & Settlement (LRS) department chuan nimin khan an conference hall-ah kum 2022 atan inhlan tharna leh infuihtharna hun an hmang a, LRS minister Lalruatkima'n a hmanpui. Minister chuan, hawihhâwmna nen mipui dawr tur leh intuai thar zel turin thawktute a chah. Minister hian LRS department chungchanga mipui hriat tur leh awmhmun aṭanga LRS department dàwr dawna thil ṭulte inkawhhmuhna video clip a tlangzarh a ni.

Kângmei ven hapta
Kolasib DC Dr H Lalthlangliana kaihhruaiin nimin khan DC conference hall-ah District Fire Prevention Committee chuan kangmei ven hapta, Fire Prevention Week hman dan tur leh hmalak dan turte an sawiho a; February 7, 2022-ah hapta hawnna neih leh March 15, 2022 ral hmaa lo/ram hâl vek tur a nih thu an tarlang.