Oil leh gas zawn chungchangah Central aṭangin thu thar la dawng lo

Mizorama tuialhthei (oil) leh gas zawn hna thawktu Oil India Ltd. leh Oil & Natural Gas Corporation (ONGC)-te hnathawh chhunzawm dan turah sorkar laipui aṭangin thu thar a la awm lo.

Geology & Mineral Resources (GMR) hotute hnen aṭanga Vanglaini thu dawn danin, nimin thleng khan sorkar laipui aṭangin ONGC leh Oil India-te'n Mizorama tuialhthei leh gas zawn hna an thawh hun chungchangah thu thar an la dawng lo a, hun pek belh an nih dawn leh dawn loh hriat a la ni lo. A ṭul angin sorkar hotute nen sorkar laipuiah bawhzui an tum thu an sawi.

September 24, 2021-a Petroleum & Natural Gas minister Hardeep Singh Puri hoa Guwahati-a Investors’ Meet on Exploration & Production Opportunities in the North East-ah Commerce & Industries minister Dr R Lalthangliana chuan, Oil India leh ONGC chu Mizorama hna an thawh chhunzawm theih nan kum li tal hun pek belh a ṭul thu a sawi a; ONGC leh Oil India hotute chu Guwahati Mizoram House-ah kâwmin, chak leh nasa zawka hma la tur leh Mizoram sorkarin puih a inhuam thu a hrilh bawk.

December 8, 2021 khan Rajya Sabha MP K Vanlalvena pawhin PRIDE, Parliament-a training tura kal Mizoram Journalist Association (MJA) member-te hnenah, Kolasib district-a Meiduma gas awmte la chhuak turin an inbuatsaih mek thu a sawi.

K Vanlalvena chuan, "ONGC-in an chhût dan chuan, Meidumah gas billion cubic metre 2.28 awm tura ngaih a ni. Mizoram chu ram zimte chhungkaw nuai thum vel kan ni a, chuvangin, Meidum hmuna ONGC-te'n gas a awm nia an hriat hi kum tam tak chhunga Mizoramin hmun danga mi hmang miah loa kan chhit tham a ni tih a rin hriat theih tawh," a ti.

Tarlan tawh angin, Mizorama oil leh gas zawngtu ONGC leh Oil India-te chuan oil leh gas hralh tham Mizoramah an la hmu lo. ONGC hian kum 2003 aṭangin Mizoramah oil leh gas zawn hna an thawk a, sq.km. 2,660 vela zauah Ministry of Petroleum and Natural Gas hnuaia Directorate General of Hydrocarbons (DGH)-in oil/gas khur (exploratory well) pali verh theihna (license) a pe. Hmun pathum verh tawh mah se, hman tura lâk chhuah tham an hmu lo a, hmun pakhat verh tur an la nei. Chutih laiin, July 2020 khan an license a tàwp tawh.

Oil India chuan May 22, 2007 aṭangin Mizoramah oil leh gas zawn hna an thawk a, sq.km. 3,619 vela zauah khur panga verh tur an neih zinga pali an verh tawh. Anni hi May 21, 2021 khan an license a tàwp a, verh tur pakhat an la nei. Sorkar laipui chuan pandemic time compensation hmangin February 2022 thleng an license a pawtsei a, hna an la thawk chhunzawm lo thung.