Governor leh MYC Chairman inkâwm

Nimin khan Raj Bhavan-ah Governor Hari Babu Kambhampati leh Mizoram Youth Commission (MYC) chairman Dr Vanlalṭanpuia, MLA an inkâwm a, MYC hmalakna leh hmachhawpte an sawi dun.

Governor chuan, MYC hmalaknate ṭha a tih thu leh Skill Development Ministry hnuaia scheme ṭha tak takte chu MYC leh LESDE lam hotute’n bawhzui chak se a duh thu a sawi a; ṭhalaite training pekah duh tâwk mai lo a, hna zawnsak kawngah chak zawka hma la turin a chah.

Dr Vanlalṭanpuia chuan, MYC chu ṭhalaite tana din a nih angin, a thawh tur bik tuksak ni lo mah se, ṭhalaite tana khawvel thar siamna leh tihhmasawnna kawngah a inrawlh thei deuh vek tih a sawi a, “Lehkhathiam hna hmu lote tana thawh tur zawnsak leh thiamthil zirtir mai ni loin, lehkha thiam sang lote tan hlei hlei MYC-in ṭan a la nasa a, chairman ka nih chhungin MYC-in ṭhalaite tan kawng tam takah remchanna a siamsak a ni,” a ti.

MYC Chairman chuan, district tinah Skill Development Training Centre siam turin central ministry-ah project thehluh a ni tawh tih sawiin, chu’ngte chu pawm a nih theih nana hmalakpui turin Larsap a ngen a ni.