January 19, Nilainia positivity rate 15.06%

January 19, Nilaini khan Mizoramah Covid-19 vei mi 984 hmuh chhuah a ni a, positivity rate chu 15.06% a ni. Nimin khan Covid-19 vei dam tawh mi 927 chhuahtir an ni a, hripui vanga thi an awm lo.

Covid-19 vei Nilainia hmuh chhuahte chu mipa 468 leh hmeichhia 516 an ni a; RT-PCR laboratory-a hmuh 166, TrueNAT hmanga hmuh 71, RAT hmanga hmuh 726 leh FIA hmanga hmuh 21 an ni. Mi 984 zinga 585-in symptom an nei a, mi 399-in symptom an nei lo.

Sample endikna district 11 zingah positivity percentage 10% aia a sànna district pasarih a awm a, a sànna ber Mamit district-ah 23.48% a ni a; 10% aia sanna district dangte chu - Aizawl 23.41%, Champhai 21.80%, Saitual 15.82%, Khawzawl 15.81%, Serchhip 14.05% leh Hnahthial 10.45% a ni.

IPR tarlan danin, Covid-19 positive hmuh tamna khua/hmun pahnih a awm a, Synod Higher Secondary School Hostel-ah mi 30 leh Dárlâkah mi 31 hmuh a ni. Lengpui Airport-ah state páwn aṭanga rawn lut zingah Covid-19 positive mi 28 hmuh a ni a, a hma ní aiin a tlem. Screening point dang - Vairengteah mi 26, Kanhmunah 14 leh Tuivaiah mi panga hmuh a ni bawk.

Lungleia RT-PCR laboratory-ah Nilaini khan swab sample endik ṭan a ni a, sample 43 endik aṭangin Covid-19 positive 11 hmuh niin, positivity rate 25.58% a tling. ZMC RT-PCR laboratory-ah mi 155 hmuh a ni.

Nimin tlai dar 5 thleng khan hripui vei dam tawh mi 927 chhuahtir an ni a; district tina chhuak zat chu - Aizawlah 378, Serchhipah 143, Saitualah 99, Champhaiah 96, Mamitah 58, Lungleiah 44, Khawzawlah 42, Kolasib-ah 33, Siahaah 21, Lawngtlaiah pariat leh Hnahthialah panga a ni.

IDSP record angin, Mizoramah Covid-19 vei 1,56,054 hmuh chhuah a ni tawh a, mipa 74,739 leh hmeichhia 81,315 an ni a, mipa aiin hmeichhia 6,576-in an tam zawk. Nimin tlai dar 5 thleng khan mi 1,47,330 (94.41%) chhuahtir an ni tawh a, mi 576 (0.37%) thi tawhin, enkawl mek mi 8,148 (5.22%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,56,054 chu mi 1,000 zelah hripui vei mi 142 an awm ang a ni a; mi 1,00,000 zela Covid-19 vangin mi 52 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 19, 2021 thlenga swab sample endik tawh 16,03,446 aṭanga RT-PCR hmanga endik zat percentage chu 20.94 a ni a, RAT hmanga endik zat chu 73.27% a tling.