MLA-in hmasawnna hnathawhte a en

MLA Vanlalhlana chuan nimin zing khan a bial, Aizawl North-I chhunga Bawngkawn Shalom, Bawngkawn Vengthar leh Bawngkawn Venglaite a tlawh a, hmasawnna hna thawh tawh, thawh mek leh thawh tura hmachhawpte a enfiah.

Vanlalhlana chuan, Bawngkawn veng chhung inkalpawhna kawng siam tur a la tam thu leh a ngaih pawimawh thu a sawi a, “Sorkarin MLA fund a pek chhuah dan azir zelin daihzâi leh dik tak zelin pawisa awm ang ang bial hmasawnna turin thawh zel a ni dawn. Sorkar pawisa hi mipui pawisa a nihna ang ngeiin mipuiin an chhawr ṭangkai ngei theihna turin dik taka hman a ṭul,” a ti.

Covid-19 hripui léngin a bial chhungah harsatna tam tak a thlen thar leh tih sawiin Vanlalhlana chuan, “A ṭul dan ang zelin a do lêtnaah bial mipuite nen ṭan tlân zel a ngai a ni,” a ti a; a bial mipuite chu fimkhur taka awm tur leh harsatna an neih chuan a hnenah thlen zel turin a chah a ni.