Mizorama ram hring hloh zingah Champhai district-a hloh a tam

Kum 2021 khan Champhai district-ah ram tikângtu mi paruk hrem an ni. Kum 2019-2021 chhunga Mizoramin ram hring (forest cover) sq.km. 185.51-a zau a hloh zinga sq.km. 113.90 chu Champhai district (Khawzawl district pian hma)-a mi a ni.

Champhai DC Maria CT Zuali hoa January 19, Nilainia Champhai District Fire Prevention Committee-in kângmei vên hapta, Fire Prevention Week hman dan tur an sawihonaa tarlan danin, November 2020 aṭanga May 2021 chhung khan Champhai district-ah ram kâng ṭum 366 a thleng a, ram hectare 3,396.61-a zau a kâng. Ram kâng zinga 363 chu lo/leipui/huan kâng vang a ni a, forest area kâng ṭum thum a awm.

Kum 2021 khan ram tikângtua puh mi pali lakah Champhai Police Station-ah FIR thehluh a ni a, heng bakah hian ram tikângtu mi pahnih chu Rs. 500 ve ve chawitir an ni. Hun bituk chhunga lo hâl hman lo khaw pakhat awmin, State Level Sub-Committee on Fire Prevention aṭanga phalna an lak hnuah an hâl thei chauh a ni.

India State of Forest Report (ISFR) 2021 tarlan danin, Mizoram zau zawng aṭanga chhûta 0.74% chu ngaw dur chhah ṭha (very dense forest) a ni a, ngaw dur chhah lutuk lo (moderately dense forest) 26.11% leh ram hring (forest cover) 84.53% a awm.

Undivided Champhai district-ah ngaw dur chhah ṭha sq.km. 55.36, ngaw dur chhah lutuk lo sq.km. 942.9 leh ram hring (open forest) sq.km. 1,375.63-a zau a awm anga chhût a ni. Kum 2019-2021 chhung khan Mizoramah sq.km. 113.90-a zau ram hring (forest cover) hloh a ni a, chu’ng zinga sq.km. 113.90 chu undivided Champhai district-a mi a ni.

Maria CT Zuali chuan, kângmei ven hapta chuan kângmei chuak ṭhin tihtlem kawngah hmasawnna a thlen ngei a beisei thu sawiin, “Kângmei chhuah chhan hrang hrang zir chiang a, kângmei tichhuaktu hrang hrangte thleng pha, inzirtirna awmze nei thei tura ṭan lâk a ngai tak zet. Awmze neia mipui thleng pha leh zawm ṭheuh tur zirtirna kalpui a ṭul,” a ti a; kângmei tichhuak lo tur te, kângmei ven leh ṭhelh kawngah neitu nihna thinlung pu chunga ṭhahnemngai taka thawk ṭhin turin mipui a chah.

Ṭhukhawm chuan, kângmei ven hapta chu February 7-12, 2022 chhung hman te, kângmei chhuak vên kawnga ti ṭhate hnena lawmman siam te, March 15, 2022 aia tlai loa lo/huan hâl hman vek tura hriattirna chhuahte an rél a ni.