Mamit DC sawn phûtin kawng zawh ; September 10 hma-a sawn an phût

YMA sub-headquarters, Mamit Mamit all NGO leh all party-te huaihawtin nimin khan mipuite'n Mamit bawrhsap Bhupesh Chaudhary sawn chhuah phûtin kawng an zawh a; Sepetember 10, 2018 hma ngeia sawn chhuak turin sorkar an phût.

Kawngzawh ṭan hmaa inkhawm tawi buatsaihah Mamit sub-hqrs. YMA vice president K Lalthanzama chuan, Bhupesh Chaudhary-a'n Mizo mipui a zah loin a thamlo hle niin a sawi a, "Rang taka kan district chhuahsan turin kan duh. Kan hma lam hun atan kan district hian amahah beiseina sang tak kan nei ngam tawh lo," a ti.

Kawngzawh tawpnaa thu sawitu, Central YMA president Vanlalruata chuan, Mamit mipui hun hman dan chuan Mamit DC sawn chhuah a ṭul tawhzia a tihlan thu sawiin, "A hlawhtlin hma chuan kan bei zel dawn. Mizote hi hnam dang nena khaikhin chi kan ni lo a, inngaitlawm leh tih nuam, thu awih theih tak, buaina duh ngai lo kan ni," a ti a; Mizo mipuite'n an duh loh DC chu sawn chhuak thuai turin sorkar an phût tih a sawi.

Central YMA President chuan, engtik lai maha Tripura relief camp-a electoral roll endik an remtih ngai dawn loh thu sawiin, "Kan remti lo chunga Tripura camp-a roll endik duhtu hi Mizoramah a awm reng kan remti lo," a ti.

Mamit sub-hqrs. YMA president K Eley Rosanga chuan, Election document venghim zo lo leh document bo chungchangah CYMA, MZP, MSU, Mamit sub-hqrs. YMA, Taitesena Group YMA leh Langkaih YMA hruaitute man tura thu petu Bhupesh Chaudhary chu engti kawng pawha Mamita awm an remtih tawh loh thu a sawi.

Mamit aṭanga thu dawn danin, kawng zawhnaah hian sorkar hnathawkte pawh an tel a, kawngzawhte'n an paltlang china dâwrte chu khâr vek a ni. Kawngzawh vangin buaina leh harsatna lian tham chhuak a awm lo.

Kawngzawhnaa resolution
. Mizoram sorkar leh Mizoram all NGO-te duh dan kalha Tripura-a awm Tuikuk-te electoral roll-a a rûk a rála thun luih a tum hi kan duh lo.
. Mizoram MLA General Election 2018 lo awm turah hian Mizoram páwnah Tuikukte'n engti kawng mahin vote an thlak kan remti lo.
. Mizo mipuite leh tlawmngai pawlte hmusit leh diriam taka ṭawng khum a, man atan a vau ṭhintu DC hi kan duh lo.
. Bhupesh Chaudhury, IAS, DC, Mamit kaih­hruaina hnuaiah MLA election thianghlim leh felfai a awm theih kan ring lo.
. Bhupesh Chaudhury, Mamit DC hi sorkarin September 10, 2018 hma ngeiin Mamit aṭangin sawn chhuak rawh se.