National Award for Teachers 2017 dawng

Nimin Teachers Day-ah khan Vice President M Venkaiah Naidu chuan National Award for Teachers dawngtute hnenah chawimawina a hlan a; India rama zirtirtu ṭha chawimawina sang hi GS Zaithantluanga, Kolasib Diakkawn High School-a headmaster pawhin a dawng.

National Award for Teachers 2017 semna leh hlanna inkhawm hi nimin chawhma khan New Delhi-a Vigyan Bha­van-ah neih a ni a, India ram pumah award dawngtu state hrang hrang aṭangin mi 45 an awm. Award dawngtute hi prime minister Narendra Modi chuan September 4 khan PMO-ah a kâwm a ni.

GS Zaithantluanga chungchangah hian PM Narendra Modi chuan, "Zirlaite'n science lamah ngaihtuahna an sen viau tawhna karah zirlaite'n hnam nunphung leh zia (culture) an hriat theihna tura zirtirtu ṭha a ni a, sikulah vocational education leh skill trai­ning hmasawnna turin hma a la nasa hle bawk. Ka chhuang hle a ni," a ti.

Thu dawn danin, Na­tio­nal Award for Teachers dawng tur hian India rama state liante'n mi paruk leh state tête'n mi pathum an rawt thei. State-in an rawtte chu Ministry of Human Resource Development-in New Delhi-ah koin, minute 10 vel chhung powerpoint presentation an neihtir a, presentation an neih aṭangin Award dawng tur chu an thlang ṭhin a ni.