Mizoramah Teachers Day lawm a ni

Nimin khan Zirtirtute Ni, Teachers' Day a ni a, Mi­zorama sikul hrang hrang­te'n an sikulah an lawm a, hlim takin hun an hmang.

Teachers' Day-ah hian sikul tam takah chuan zirlaite'n an zirtirtute an chawimawi a, thilpek chi hrang hrang an hlan. Sikul ṭhenkhatah erawh chuan zirlai naupangte dinhmun inan lohna avangin zirtir­tute hnenah thilpek pek an remti lo a; sikul tam takah chuan zirtirtute'n zirlaite hnenah thilpek an pek bakah, ei leh in tur an buatsaihsak a ni.

Mizo Zirlai Pawl (MZP) chuan thuchhuah siamin, Zir­tirtute Ni chu zirtirtute hlutna leh pawimawhna mipui hnena hriat thartirtu ni se an duh thu leh tun aia nasa leh zuala zirlaite'n zirtirtute an zahna an lantir a pawimawh thu an tarlang.

MZP chuan, "Ram leh hnam rohlu chu zirtirtute hi an ni. Vawiina kan hmasawnna hrang hrangte hi zirtirtute vanga kan neih a ni a, he ni pual hian zirtirtute zawng zawng duhsakna kan hlan a, zahna chibai kan bûk a ni," an ti a; zirtirtute chu zirlaite kohhran, khawtlang leh ram tana mi ṭangkai ni tura chhertu an ni tih inhre thar turin an ngen bawk.

Teachers' Day hi khawvel ram hrang hrangin an hman hun a inang lo a; India ramah chuan zirtirtu ropui leh India President pahnihna leh Vice President hmasa ber Dr Sarvepalli Radhakrishnan-a pian champha, September 5-ah kum 1962 aṭangin hman a ni.

Dr S Radhakrishnan hi philo­sophy lama scholar ropui tak a ni a, University of Mysore-ah professor a nih tawh bakah, University of Calcutta-ah King George V Chair of Mental and Moral Science a ni tawh a, University of Oxford-a Eastern Religion and Ethics-ah professor a ni tawh bawk. India rama civil mite chawimawina sang ber Bharat Ratna leh British Royal Order of Merit honorary membership nihnate a dawng tawh a ni.