KHAWTHLIR

India ambassador
Indian Foreign Service (IFS), 1998 batch B Vanlalvawna chu tun hnai khan Azerbaijan rama Indian ambassador atana ruat a ni. B Vanlalvawna hian Sydney, Australia-ah Consulate General of India hna a chelh mek a ni.

DC mawhphurhna
Home department chuan thuchhuah siamin, district commissioner (DC)-te chu Airgun Licensing Authority mawphurhna thla ruk chhung la tura hriattir an nih thu a tarlang a; "Airgun Licensing Authority mawphurna hi DC thuneihna hnuaiah August 1, 2018 aṭanga January 31, 2019 thleng awm tura ruahman a ni a, Mizoram sorkar hnuaia Standard Operating Procedure (SOP) anga kalpui tur a ni ang," a ti.

Silai tun tur
Siaha DC chuan thupek chhuahin, Mara Autonomous District Council chhungah kumin MLA inthlan felfai tak a awm theihna atan silai neitu/kawltu zawng zawngte chu an awmna aṭanga police station/outpost hnai berah an silaite tung vek turin a hriattir. Silai tun hun atan hian order chhuah aṭanga chawlhkar khat chhung hun pek a ni.

Ruang chhar
Nimin chhun dar 11 vel khan Aizawl Zotlang aṭanga Zohnuai panna step bula Nunmawia in rel lai hnuaiah ruang chhar a ni a, hliam mi dang pakhat hmuh a ni bawk. Zotlang Branch YMA hruaitute sawi danin, mi pahnihte hi September 4 zana chesual nia hriat an ni a; hliam zawk chu Chawnpui Veng mi niin, Ebenezer Hospital-ah laka enkawl mek a ni. He thu ziah lai thleng hian mitthi zawk chu tu nge a nih hriat a la ni lo.

Lungphum phum
Ramhlun South High School office building sakna tur lungphum chu nimin khan State Planning Board vice chairman H Liansailova'n nimin zing khan a phum. Building hi NEDP sum cheng nuai 26.55 senga sak tur a ni.'

Police Teachers Day
Director General o Police (DGP) Balaji Srivastava duh angin nimin khan Police department hnuaia unit hrang hrang sikulah Teachers' Day lawm a ni a, battalion commandant-te'n an hmanpui. Teachers Day lawmnaah hian zirtirtute hnenah incentive cash award an hlan a ni.