Sainik Board-in an hmalakna an thlirlet

Mizoram Rajya Sainik Board (MRSB) chu nimin khan an president Kummanam Rajasekharan, Governor hoin Raj Bhavan-ah an ṭhukhawm a, hmalakna hrang hrangte an thlir let.

Governor chuan, kum kal ta chhunga MRSB-in sipai bángte leh an chhungte tana hmalakna hrang hrang a neih thu sawiin, "Chu'ng hma­laknate chuan rah ṭha a chhuah a ni. Mizoram sorkar pawhin indonaa thi leh hliam sipai chhungte tana chhawm­dawlna ex-gratia a tihpun a, World War-II veteran leh hmeithai chhungkua 565 hnenah Rs. 97,09,000 pek a ni," a ti a; Amred Forces Flag Day 2017 puala sum khawn khawm pawh ex-servicemen leh hmeithai chhungkua 39-te hnena hlan a nih thu a sawi.

Sainik School, Chhingchhipah India rama sipai sikul zinga a hmasa ber ni turin kum 2018-19 academic session aṭangin hmeichhe zirlai naupang luhtir a nih thu sawiin Larsap chuan, "Ex-Servicemen Contributory Health Scheme (ECHS) hnuaiah Mizoramah polyclinic pahnih a awm a, member 5,801 an awm mek a ni," a ti.

Meeting-ah hian July 5, 2017-a an thu­relte nemnghehna neiin, an thurel bawhzuinate an thlirho nghal. Ex-Servicemen Contributory Health Scheme (ECHS) hnuaia rate awm sate chu ennawn ṭha an ti a, hei hian sorkar damdawi-in leh mimal damdawi-in ECHS hnuaia inziak lut duh pawh a tihpun phah tur thu sawi a ni.

Sorkar laipuia Kendriya Sainik Board-in Kolasib leh Champhai district-ahte Sainik Welfare & Resettlement office hawn rem a tih thu tarlan a ni a; Sainik Welfare & Resettlement department hnuaia post ruak hnawhkhah chungchang an sawiho bawk.

DG Recruiting NE Region aiawha telte chuan October, 2018 sipai lak rûnpui lo awm tura diltu mi 1,500 vel chauh an la nih thu an sawi a, ṭhalaite'n sipai an zawm duh nan sorkar hotute chu thawhpuiah an sáwm.

Meeting-ah hian Lok Sabha MP CL Ruala leh MLA pahnih - Lt.Col. ZS Zuala leh Hmingdailova Khiangte te pawh an tel a ni.