ZPM-in mipui bum tumah MPCC leh MNF an puh
MPF leh political party-te thawhhona thuthlunga 'Inthlan puan a nih hnuah chuan' tih chu MNF leh Congress party-te'n an haider tih sawiin ZPM chuan, "Chhuanlam dawráwm tak hmangin MZU zirlaite leh Mizo mipui min bum an tum a, MPF leh political party-te thuthlung an tibawrhbáng a. MNF leh MPCC-te hian thingtlang lam tih hmasawnna, education leh ramri chungchangah hian hmachhawp an nei lo ni-ah kan ngai," an ti.
ZPM tarlan danin, February 28, 2018 khan ICFAI University-a Political Science department-in political party hrang hrang tan joint platform (Policies & Manifesto at a Glance. Divission by Political Parties The upcoming State Legislative Assembly Election 2018) an lo buatsaih tawh a; chutah chuan political party hrang hrang aiawh an tel a, MPCC
aṭangin general secretary Parliantluanga leh MNF aiawhin general secretary Lalruatkima, MLA-te pawh an tel.
ICFAI University-in kumina joint platform an buatsaihah MPCC leh MNF-te'n ‘MPF leh Political Party Thuthlung’ chhuanlamah an hman loh laia Varsity Platform 2018-ah chhuanlam atan an hmang si chu, Mizoram tan zawrh tur an neih loh vanga an ngaih thu ZPM chuan an tarlang.
ZPM chuan, kumina Assembly inthlanpui awm turah Chakma candidate nei lo tura NGO Coordination Committee-in August 18, 2017-a political party hrang hrang an ngenna chu ZPM chuan a takin a tihlawhtling dawn tih an sawi a, "Political party dang - MNF, MPCC, BJP-te hian tlawmngai pawlte ngenna hi an tihlawhtling ve dawn em tih hi ZPM zawhna a ni," an ti.