Phullen-ah Agri Clinic buatsaih
Agricultural Technology Management Agency (ATMA), Aizawl district chuan nimin khan Phullen-ah Agri. Clinic leh pesticide hlauhawm leh hlauhawm loh dan te, a hman dante zirna an buatsaih a, Agriculture minister KS Thanga khuallian a ni.
KS Thanga chuan, sorkarin kut hnathawktute hmasawn nan nasa takin hma an la a, kut hnawthawktute dâwmkanna NLUP leh NEDP hnuaiah hlawhtlinna a awm mek niin a sawi a, "Sorkar hmalaknate hi en liam mai leh thlahthlam mai sorkar chuan ṭha a ti lo a, NLUP leh NEDP hmanga bul ṭan leh a hlawhtlinna hmuh mekte hi tlo leh heisel zawka kut hnathawktute'n an neih zel theih nan mithiamte hmanga enkawl zui hi sorkarin a tum a ni," a ti.
Agriculture Minister chuan, lo neitute'n an thar hlâwk zawk theih nan thlai enkawl nan damdawi leh pesticide hman a pawi lo tih a sawi rualin, uluk leh dik taka hman a ngaih thu a sawi a, "Thlai enkawl nana kan damdawi (pesticide) hmante hian kan taksa tan hrisel lohna a thlen thei a, dik lo taka kan hman chuan natna hrang hrang a thlen thei a ni," a ti a; pesticide-te chu dik taka hman a ṭul thu a sawi.
Pesticide chungchang zirhona hi Agriculture, Horticulture, Sericulture, Fisheries leh AH&Vety department leh KVK-te'n an ṭawiawm a; chawhnuah Agri Clinic neih niin, ran vulhtu te, lo neitute leh sangha leh pangang khawitute hnenah an mamawh angin damdawi an pe chhuak. Phullen bakah, Thanglailung, Phuaibuang leh Zawngin khua aṭangin lo neitu 266 an tel a ni.