Congress chhuahsan turin ka la inphal lo - Lalrinliana Sailo

Tuichang bialtu MLA Lalrinliana Sailo chuan kumin Assem­bly inthlanpui awm turah candidate chungchang­ah inlêng a neih ṭhin ngei thu a sawi a, chutih rualin, "Congress chhuahsan turin ka la inphal ngai lo," a ti.

Vanglaini palai zawh­na chhangin ex minister Lalrinliana Sailo chuan, "Congress party hi chhuahsan turin ka la inphal ngai lo a, chhuahsan dawn ta ila chuan ka bial mipuite ka ngai ngawt ang. Zêp thu chêng lo, inléng ṭha tak takte chu ka nei ngei a, keia kara min rawn kâwm hi ka lawm khawp mai," tiin a sawi.

Zawhna dang chhang­in Lalrinliana Sailo chuan, Nilaini zan pawh khan chief minister Lal Thanhawla leh an party hotu dangte nen tunlai politics boruak khùnkhân taka sawia an titi thu a sawi bawk.

August 14, 2018-a Khawzawl DC Rest House tuala Khawzawl Group Congress party worker meet-ah Congress Legislature Party (CLP) treasurer Zodintluanga'n Lalrinliana Sailo chu kumina Assembly inthlan­­puiah Tuichâng bial­ah Congress party candidate a nih leh dawn thu a lo sawi tawh a; Lal­rinliana Sailo pawhin, Tuichang biala a din leh tur thu chief minister Lal Thanhawla'n a puan tawh chu thu nung a nih thu a lo sawi tawh a ni.

Tarlan tawh angin, Sep­tember 4, 2018- MNF Nomination Committee ṭhu­khawm chuan kumin in­thlanpuia an candidate ni thei zingah Congress vice president R Lalzirliana, Home minister leh Tui­chang bialtu MLA Lalrin­liana Sailo te chu an an telh a; R Lalzirliana chu a záwna term li a tlin tawhna Ṭawi biala MNF candidate ni tur leh Congress MLA Lalrinliana Sailo chu Chalfilh biala MNF candidate ni turin an sáwm nia thu dawn a ni.

Zira chuan Vanglaini palai zawhna chhangin, "MNF thu hi kei chuan eng mah ka hre lo, anmahni lamin min lo telh a nih chuan kei chuan ka hriatpui lo. A sâwm thuah chuan ZPM pawhin min sáwm a, BJP pawhin min sáwm a, kan insawm tawn vek ni hmiang ka ti mai," tiin a lo sawi tawh a ni.