Kum 2018 chhungin Drug licence 13 tihtawp sak

Health & Services department hnuaia Food & Drugs Administration (FDA) chuan kumin 2018 chhungin damdawi zawrh phalna, drug license an pek chhuah tawh zinga mi 13 chu an license an tihtawpsak.

Vanglaini palai zawhna chhangin Health Services joint director (FDA) Lalsawma Pa­chuau chuan, kumin chhungin drug licence 52 an pek chhuah tawh thu a sawi a, "Kumin hian drug licence neitu mi 34 chu an licence hman dan dik tawk loa hriat a nih avangin insawifiah tura tih an ni a, mi 13 chu an licence tihtawpsak a ni," a ti.

Lalsawma Pachuau chuan, drug licence an tihtawpsakte chu dan dik loa hmangte an nih ṭhin thu sawiin, "Dan phal loh ruihhlo khawihna atana lo hmang ṭhin an ni deuh ber," a ti a; insawifiahtir phawt loh chuan licence tihtawpsak a nih ngai loh thu a sawi.

Court-ah thubuai pakhat an neih mek thu sawiin Lalsawma Pa­chuau chuan, "Medical representative pakhat, a identity card kan tihtawpsak tawhin damdawi a lo zuar kual a, kan man a, Court remtihnain jail-ah dah luh a ni. Police-te pun kher lo pawhin dan hnuaiah hetianga dan dik loa an licence lo hmangte hi kan man thei a ni," a ti.