KHAWTHLIR

Health Camp
Serchhip district-a PHE department, Swachh Bharat Mission (Gramin) leh Mercy Hospital, New Serchhip-te chuan nimin khan East Lungdara Thangburha Hall-ah Health Camp an buatsaih a; PHE executive engineer F Lalsanglura'n a hawng. Health Camp-ah hian Mercy Hopital-a doctor bakah Serchhip District Hospital-a Ortho leh Surgeon doctor-te'n mipui hriselna an enfiah a, chawhnuah East Lungdar PHC-ah zai tênau (minor surgery) tih nghal a ni.

Zorama thlâwp
Kolasib district-a MNF Block panga office bearer leh secretary-te nimina joint meeting chuan resolution pass in, MNF president Zoramthanga kaih­hruaina an rin tâwk thu leh Mizoram inthlanpui awm sorkarna siam tura Zoramthanga kaihhruaina hnuaia MNF General Headquarters hmalakna an thlawp thu an tarlang. MNF Gen. Hqrs.-in Kolasib district-a bial pathuma candidate an dah apiang an tlin theih nan hmalak an tum thu an puang bawk.

Thisen pe
Baptist Higher Secondary School NSS chuan nimin khan an sikulah blood donation camp an nei a, Christian Hospital, Serkawn tan thisen unit 140 an pe a, a petute mipa 78 leh hmeichhia 62 an ni.

DC-in hawng
Kumina Assembly in­thlanpui awm tura inbuatsaihna kal mek­ah Aizawl DC office complex-ah Model Polling Station siam a ni a, nimin khan Aizawl bawrhsap Dr A Muthamma-i'n a hawng. Polling station hawn hnu hian DC Office staff leh a bul hnaia awmte'n electronic voting machine (EVM) hmangin vote an thlak chhin a ni.

SEC an thu
Synod Executive Committee (SEC) meeting vawi 274-na chu nimin khan Synod Office-a Lloyd Hall-ah neih a ni a, Synod moderator Rev. F Lalrinnunga'n a kaihruai. Tun ṭuma SEC-ah hian thurel tur 18 a awm. Meeting zawhah Beihrual kum 100 tlin, centenary hriat rengna thuziak (tablet), Synod Office tuala siam chu Synod Moderator-in a tlangzarh bawk.