Mitdelte tan inelna buatsaih a ni
National Atlas & Thematic Mapping Organisation, Kolkata leh Indian National Cartographic Association-te chuan nimin khan Special Blind School, Durtlangah mitdel naupangte tana National Quiz Competition leh Thematic Mapping an buatsaih.
An hun hmanpuitu Persons with Disabilities (PwD) commissioner Dr Lalnunthara chuan, rualbanlote tana sorkar hna hauhsak chungchangah chak taka hmalak mek niin a sawi a, "Rualbanlote tana sorkar hna hauhsak chungchangah Delhi aṭangin mithiam pahnih chah chhuah tum mek a ni a, anni hian September 25-26 khian sorkar official-te training pe tura ruahman a ni," a ti.
Dr Lalnunthara chuan, sorkar hnathawk zinga beng ṭha lote tan damdawi-ina awm kher ngai loa medical reimbursement an tih theihna tur ngaihtuah mek a nih thu a sawi a; Right to Persons with Disabilities Act leh Rules-te Mizo ṭawnga dah turin hmalak mek a nih thu leh press-ah dah mek a nih thu a sawi bawk.
National Quiz Competition leh Thematic Mapping-ah hian mitdel zirlaite chu an zirlai bakah, general knowledge leh map hmanga ram leh thil nihphung awm dan hrang hrang inhriatsiak hmanga ineltir an ni a; National Atlas & Thematic Mapping Organisation-a hotu Dr Sweeta Banerjee-i'n naupangte chu zawhna chi hrang hrang a zâwt a ni. Special Blind School-ah hian zirlai 28 an awm mek.