Sanitation Campaign 2018 hawng
Nimin khan Khatla kâwnah Sanitation Campaign 2018 chu Aizawl DC Dr A Muthamma-i'n a hawng a; Bawrhsap chuan, campaign hian Aizawl khawpui tan faina kawngah rah ṭha a chhuah ngei a beisei thu a sawi.
Aizawl DC chuan, tui kawng leh lui luankawrte fai zawka enkawl theihna atan Campaign chu hman ṭangkai ṭheuh tum ni se a duh thu a sawi a, "Sanitation campaign hi faina kawnga kan thawhho nan hmanraw ṭangkai takah i hmang ang u," a ti.
Aizawl additional DC John LT Sanga chuan, Mahni veng leh a chhehvelte bakah, luikawr tihfaite chu mi tin mawhphurhna a nih thu sawiin, "Hmasawn leh changkan kan duh chuan fai hmasak a ngai," a ti a; Sanitation Campaign chhunga local council hrang hranga hmalakna kalpui tumte hi neitu thinlung pu chunga kalpui ni se an duh thu a sawi.
NEDP hnuaiah UDPA department kaltlangin Aizawl DC-in Sanitation Campaign 2018 hi a buatsaih a, campaign chhung hian tui hna, tuihâwk luankawr leh lui kamte tihfai tum a ni.