Private hospital-te thisen lâk dan Health dept-in tidanglam hret

Private hospital-te'n sorkar blood bank aṭanga damlote tana thisen an lâk danah Health department chuan an thutlukna hmasa a tidanglam leh hret.

Thisen lâk dawna Hospital & Medical Education (HME) Director hriatpuina/phalna ngai tura tih chu thlâkin, medical superintendent emaw, casualty-a duty medical officer (doctor) hriatpuina/phalna ngai tura thlak a nih thu an tarlang.

Health department thuchhuah chuan, private hospital-a thisen pek tur sorkar blood bank aṭanga lak chhuah chungchanga tunlai chanchinbu leh social media hrang hranga langte chu a sawifiah a; ruahmanna thar chu private

hospital-te hrêk tumna a ni loa sawiin, "Damlo thisen mamawhte tumah chî-âi lo turin Health department chuan mipuite a hriattir a ni," a ti.

Health department thuchhuah chuan, thisen mamawhtute'n blood bank aṭanga direct-a thisen an la chhuak mai ṭhin chu him lo leh mihring nunna atana pawi thei niin an tarlang a; tuna kalphung thar chu damlo, thisen mamawhtute tan harsatna a tling loah sorkar/department-in a ngaih thu an tarlang bawk.