Champhai NGO-te hmalak zelna turah YMA Sub-Hqrs. an tel tawh dawn lo
Champhai District NGO Coordination Committee-in Champhai DC Maria CT Zuali sawnna thupek sût tura Mizoram sorkar an karnaa hmalak zelna turah YMA Sub-Headquarters, Champhai hruaitute an tel tawh dawn lo. NGO-te huaihawtin vawiin hian Champhaiah kawngzawh a ni dawn.
Vanglaini palai zawhna chhangin Champhai Sub-Hqrs. YMA hruaitute chuan, Champhai NGO-te hmalak zelna turah an inhnûkdâwk lo a, an tel tawh dawn lo tih sawiin, "Committee chuan a issue azirin telpui ni se, tiin thu kan dah tawh a, chu chu January 22, 2022 zan khan kan ngaihtuah leh a, tun dinhmunah chuan tel tawh rih loh kan ti tlu a ni," an ti.
Champhai Sub-Hqrs. YMA hruaitute chuan, YMA-in Central YMA kaltlangin Maria CT Zuali awm hun chhung pawhsei an dil tih sawiin, "YMA dilnate ngai pawimawhin kan DC awm hun chhung pawhsei a ni a, sorkar pawh a fán thei khawp mai," an ti a; Maria CT Zuali awm hun chhung tur chu pawhsei ni lo se chuan an thu pawh a danglam tur thu an sawi.
Dan loa thil tih chu YMA-in an thláwp ngai lo tih sawiin Sub-Hqrs. YMA hruaitute chuan, "Kuhva rah hmanga sumdawnna system fel zawka kalpui dante ngaihtuahna kan hman lai tak a ni," an ti.
Champhai Sub-Hqrs. YMA hruaitute chuan, YMA chu sorkar do ngawr ngawr tur an ni lo tih sawiin, "Tunah chuan sorkar do ngawr ngawr kan ang ṭan. Kan thuthlung nen a inkalh dawn tlat a, ram roreltute thawhpui thiam tihte kan thuthlung a ni tlat," an ti a; ram ni pawimawh Republic Day boycott hial tum a nih avangin YMA tel zui zelna chia an ngaih loh thu an sawi.
Champhai District NGO Coordination Committee-ah member an nih ve loh thu sawiin Sub-Hqrs. YMA hruaitute chuan, "Ṭul leh àwm chinah chuan committee chuan thawhpui zel a rél. YMA hi hnam issue leh ram pum issue pawh ni lem loa agitation-a tel hi kan pawl nih phung nen a him chiah lo. Kan lo kalpui tawh chinah i duhtâwk ang u committee-in a ti a ni," an ti.
Hetih lai hian, Champhai District NGO Coordination Committee hruaitute chuan Vanglaini palai zawhna chhángin, Sub-Hqrs. YMA thu leh hla chu official-a hriat an neih loh avangin ruahmanna an lo siam tawha an tel vena turah chuan an telh zel dawn tih an sawi.
Champhai District NGO Coordination Committee January 14, 2022-a YMA Sub-Hqrs, Champhai pisaa ṭhukhawm chuan, bawrhsap Maria CT Zuali transfer order, January 13, 2022-a tihchhuah chu January 18, 2022 ral hmaa sût turin Mizoram sorkar an phût a; transfer order an hâl nghal.
Mizoram sorkarin January 18 ral hnuah pawh transfer order a sût loh avangin Champhai Joint NGO hruaitute chu January 19 chhun khan an ṭhukhawm leh a, sorkar laka lungawi lohna lantir dan tur an rél a ni. Ruahmanna an siam angin, January 21, 2022 khan Champhai khawpuia dawr zawng zawngte khâr a ni a; vawiinah kawngzawh an huaihawt dawn a, naktukah sorkar pisa zawng zawng khâr a, January 26-ah total bandh huaihawt leh Republic Day boycott an tum bawk.
Mizoram sorkar chuan January 20, 2022 khan notification tichhuakin, January 13, 2022-a notification tihchhuaha IAS leh MCS officer-te awmna hmun sawn zingah, DC-te chu January 26-a Republic Day thleng an awmna ngaia awm rih turin a hriattir a ni.
January 13, 2022-a DC sawnte chu Champhai, Kolasib, Mamit, Siaha leh Serchhip DC-te an ni a; January 20-a notification tihchhuah leh hian Serchhip DC a huam lo thung.
Champhai NGO ruahmanna
21.1.2022: Champhai khawpuia dawr zawng zawng khâr
24.1.2022: Kawngzawh
25.1.2022: Sorkar pisa zawng zawng khâr
26.1.2022: Total bandh huaihawt leh Republic Day boycott