Health worker 400 leh nurse 200 Lak belh turin hmalak a ni - Dr Thangtea

Health minister Dr R Lalthangliana chuan January 22, Inrinni khan Lunglei district-a Buarpui, Káwlhâwk, Sertlangpui, Lungdai South leh Serte khuate a tlawh a; Health department hnuaiah health worker 400 leh nurse 200 lak belh tura hmalak mek a nih thu a sawi.

Dr R Lalthangliana chuan, Health department tichak turin infrastructure development leh thawktu lâk belh lamah nasa taka hmalak zel tum a nih thu sawiin, "Thawktu indaih lohna a nasa a, thawktute an hah tak zet. Recruitment pawh neih chhoh zel tum a ni a, health worker 400 leh nurse 200 lak belh turin hmalakna a kal mek a ni," a ti a; thawktu lak belh turte chu a ngheta lak nghal vek theih a nih rih loh thu a sawi a ni.

'Strengthening of health system in Mizoram project' hnuaiah World Bank kaltlangin cheng vbc. 280 séngin Mizorama hriselna lama ruhrel tihchangtlunna tur nikum aṭangin bul ṭan a nih thu sawiin Minister chuan, "Thingtlanga health infrastructure leh primary healthcare tihhmasawn ka ngai pawimawh hmasa a, Mizorama sub-centre zawng zawng health & wellness centre-ah upgrade vek tum a ni," a ti a; health & wellness officer (B.Sc Nursing)-te'n an enkawl tawh dawn thu a sawi.

Health Minister chuan, Buarpui damdawi-in (PHC) chu tihchangtlun zel tum a ni a, khum pali awmna Covid-19 Isolation Ward sakna tur cheng nuai 43 hû DPR peih a nih tawh thu te, NABARD Rural Infrastructure Development Fund (RIDF-XXVII) kaltlanga hmalak tur a nih thu te, x-ray room, fencing leh staff quarters-te pawh ruahman a nih tur thu te, Bungtlang West leh Lungdai South-a health clinic hawng turin order tihfel a nih tawh thute a sawi bawk.

Mizorama Covid-19 vei hmuh zat a pung chho mek tih sawiin R Lalthangliana chuan, fimkhur turin mipui a chah a; khua a tlawhahte hian kut tihfaina, personal protective equipment, sample endikna hmanrua, hmai tuamna leh damdawite a pe a ni.