Saitual, Keifang leh Rulchawmah Total lockdown kalpui mek a ni

Saitual District Magistrate chuan Covid-19 vei an pun zel avangin Saitual, Keifang leh Rúlchàwm khuaah total lockdown a puang a; January 21, 2022 zanlai dar 12 aṭang khan kalpui niin, January 31, 2022 zanlai dar 12 thleng a awh ang.

Saitual District Magistrate chuan, khaw pathumte chu hripui avangin restricted area-ah puan mek an nih thu tarlangin, "Hri léng hian kiam lam aiin zual lam a la pan mek zel avang leh hri vei hmuh chhuah an la pun zel avangin heng khuaahte hian inkhuahkhirhna khauh zawk kalpui a ṭul niin a lang. Hri léng darh zau zel tur danchah vat a ṭul avang leh mipui him zawkna atan total lockdown puan a ni," a ti.

Inkhàrkhip chhung hian biak-ina inkhawm leh inneih inkhawm phal a ni lo a, mitthi vuinaah a hmuna leng zatve (50%) village task force enpuina hnuaiah tel phal a ni. Covid-19 symptom neite chu task force-ah inhriattir tur a ni a, task force-in a ṭul anga hma la turin medical officer-ah an report ve leh dawn a ni.