Ramvahnaa ramsa emaw tia Inkah hlum ṭum hnih a thleng ; Lawngtlai dist-ah silai nena ramvah khap

Mizoramah kumin January thla chhungin ramvahnaa ramsa emaw tia inkah hlumna ṭum hnih a thleng tawh. Hetih lai hian, Lawngtlai bawrhsap Dr Andrew H Vanlaldika chuan, Lawngtlai district chhungah silai leh hmanraw dang nena ramvah leh sa pêl khapna thupek a chhuah.

January 11, 2022 tlai dar 4 vel khan Thenzawla Police Training School (PTS)-a awm mek constable Hmingthansanga (39) s/o Lalkiamlova, Thingsulthliah chu an ramvahnaah a ramvahpui B Lalruatkima s/o B Lalhranga, Thenzawl Vengthlangin ramsa emaw tiin a kâp hlum.

Thu dawn danin, Hmingthan­sanga leh a ṭhiante chu Thenzawl leh Sialsuk inkara Sialsuk ramah sa pêlin an ramvâk a, Hming­thansanga chu ramsa emaw tiin a ṭhianpa B Lalruatkima'n a kâp a, Hminthansanga chu a hmunah a thi nghal a ni.

January 20, Ningani tlai dar 4:30 vel pawh khan Sesawm khua, Lunglei district-a PC Zoliana (69) chu an khua aṭanga km. 2 vela hlaa Vanlalhlana (27) s/o Lalrenga, Sesawm khaw thoin a ramvahnaah sa emaw tiin a kâp a, ká chhawn lohin a thi.

Thu dawn danin, PC Zoliana taksaah silai mu a lut nual a, a kâptu hian musêpin a kâp nia hriat a ni. A kâp hlumtu hian PC Zoliana chu a chawi zawh mai loh avangin khuaah kalin, mi dang a pun a, a ruang an hlâwm a ni. He thil thlengah hian police-in thubuai an ziak lut a ni.

Hetih lai hian, Lawngtlai DC chuan January 21, 2022 khan thupek chhuahin, Lawngtlai district-ah nungcha (ramsa leh sava) humhalh nan leh mihring intihpalhna thleng thei laka him zawk nan silai leh hmanraw dang hmanga nungchate leh ramsate kah emaw, tihhlum emaw khap tlat a nih thu a tarlang a, "Mi tu mah silai leh hmanraw dang kenga ramvah phal a ni lo," a ti. Thupek zâwm lote chu The Wildlife (Protection) Act, 1972 Section 51(1) tlawhchhana hrem an nih tur thu a tarlang bawk.