Covid-19 No Tolerance Week Mizoram pumah kalpui dawn

State Disaster Management Authority hnuaia State Executive Committee (SEC) chairman Dr Renu Sharma, chief secretary chuan January 21, Zirtawpni zan khan Mizoram puma hman tur Covid-19 laka nun dan phung inkaihhruaina khauh taka kenkawh hapta, Covid-19 No Tolerance Week a puang. He hapta hi vawiinah kenkawh ṭan a ni dawn a, January 31, 2022 zanlai dar 12 thleng a awh dawn.

Dr Renu Sharma chuan, Covid-19 darh zel tur vênna atana Mizoram sorkarin January 7, 2022-a January 31, 2022 thlenga hman tur inkaihhruaina a lo siam tawh chu hripui vei an pun chhoh zel avang te, hri léng dar zel tur vèn nan leh inkaidarhna a ziaawm theih nan inkaihhruainate khauh taka kenkawh ṭula hriat a nih thu a tarlang a, "January 7, 2022-a sorkarin inkaihhruaina a lo chhuah tawh chu khauh taka kenkawh tur a ni," a ti.

Covid-19 No Tolerance Week kalphung
 District Disaster Management Authority (DDMA)-in an district-ah Covid-19 laka nunphung dik inkaihhruaina khauh takin an kengkawh tur a ni.
 VTF/LTF-te'n anmahni khua/vengah Covid-19 nunphung dik ṭha takin an kengkawh ang.
 HoD/HoO-te'n an department/office-ah khauh takin Covid-19 nunphung dik an kengkawh tur a ni.
 DDMA-in hmun remchangah Covid-19 nunphung dik zawm a nih leh nih loh en zuia bawhzuitu tur incident commander leh executive duty an ruat ang.
 Police Headquarters/ district SP-te'n Covid-19 nunphung dik khauh taka kengkawh turin police duty-na tur hmun bik an siam ang a, hmun hrang hrang fang kualtu tur an ruat bawk tur a ni.
 IPR department-in media hrang hrang hmangin Covid-19 nunphung ṭha taka zawm a pawimawhzia uar takin an thehdarh ang.
 VTF/LTF-te'n anmahni khua/vengah Covid-19 nunphung ṭha taka zawm a nih theih nan a khát tâwkin thu an puang ṭhin tur a ni.