KHAWTHLIR

Vaccine la kim
Hnahthial district-a Aithur khuaah kum 18 chung lam leh kum 15-17 inkarte'n Covid-19 vaccine dose khatna an la vek tawh a, Covid-19 vei an la awm lo. Khawhri-ah kum 18 chung lamte'n vaccine an la vek tawh bawk. Aithur leh Khawhri khuate hi Hnahthial DC R Lalremsanga chuan January 22, Inrinni khan a tlawh a, VC leh khawtlang hruaitute nen khawtlang hmasawnna tur hrang hrang an sawiho a ni.

CSC pan theih
Aizawl district bawrhsap Dr Lalhriatzuali Ralte chuan, Aadhaar card atana thla lak ngaite tan Aizawl district-a common service centres (CSC) pan theih a ni tih a puang a; December 17, 2021-a Aizawl Bawrhsap Pisapui kângin a tihchhiat avanga Aadhaar thlalak ngaite chu CSC-te pan turin a chah a ni.

Drone thlawh khap
Mizorama Republic Day lawmna pui ber, Lammuala neih tur leh sorkar mi pawimawhte kal khawmna tur Raj Bhavan leh Chief Minister banglaahte venhimna ṭha taka kalpui a nih theih nan Aizawl DC Dr Lalhriatzuali Ralte chuan Lammual, Raj Bhavan, Chief Minister's bangla leh office chungahte remote control hmang drone/aerial camera thlawhtir khap a nih thu a puang. Khapna hian January 25-26, 2022 chhung a huam dawn a, sorkarin phalna a pekte a huam lo.

Kawng siam dawn
PWD chuan vawiin hian zing dar 9 aṭanga tlai dar 4 thleng Chhinga Venga Tuithiang-Bethlehem péng aṭanga Armed Veng Bazar inkar kawng siam hna an thawk dawn a, hei vang hian kawngpui chanve khâr a ni dawn. Traffic SP Rodingliana Chawngthu chuan fimkhur turin mipui a chah a, hna tibuai thei tura kawngpuia bungrua leh lirthei dah phal a nih loh thu a puang bawk.