MLA-in Ṭhaizawla ráltlânte a tlawh

Lunglei South bialtu MLA Dr K Pachhunga chuan January 22, Inrinni khan a bial chhunga Ṭhaizawl khuaa Myanmar ráltlânte awmna hmun (camp) a tlawh a; ṭanpuina leh chhawmdawlna sorkar laipuia an dilte an hmuh theih loh thu a sawi.

Dr K Pachhunga hi Ṭhaizawl khawtlang hruaitu te, Steering Committee for Myanmar (SCM), Lunglei hruaitute leh ráltlânte nen an inkâwm a; India sorkar angin ráltlânte ngaihtuah remchang rih lo mah se, Mizoram sorkarin a ngaihthah thei lo tih sawiin, "India sorkarah ṭanpuina leh chhawmdawlna dil ṭhin mah ila, kan hmu thei lo a, sorkarin remchang ang ang a ngaihtuah bakah, Mizo kan nihna zâwna tlawmngaihnain pawl leh mimal te, SCM, Lunglei ten nasa taka an ṭanpui hi a lawmawm tak zet. Mizoram sorkar pawhin theihtawp a chhuah zel dawn a ni," a ti.

Ráltlânte chu khawtlang hruaitute duh dan zâwm tur leh anmahni mikhualtute'n mikhual tlâka an ngaih theih tura khawsa turin Dr K Pachhunga chuan a chah a; ráltlânte tan ei tur chi hrang hrang, damdawi leh thil dangte a pe a ni.

Ṭhaizawlah hian Myanmar ráltlân mi 560 an awm a, January 21, Zirtawpni zan khan mi pakhat a thi a, Ṭhaizawl thlànmualah vui a ni.