Covid-19 vangin mi 581 thi tawh

Nimin khan tlai dar 5 thlengin Mizoramah Covid-19 vanga thi an awm lo a; January 21, Zirtawpni khan mi pahnih leh January 22, Inrinni khan mi pathum an thi. Mizoramah hripui vangin mi 581 an thi tawh a, kumin January thla bikah mi 35 an thi tawh.

January 21, Zirtawpni tlai dar 3:30 khan B Vanlalawia (74), Khuangpuilam, Kolasib chu hripui vangin State Referral Hospital-ah a thi a, Covid-19 vei a ni tih January 4, 2022 khan hmuh niin, January 6 aṭangin SRH-ah enkawl a ni. Lalnghinglova (85), Lungpho, Serchhip district pawh January 21 zan 9:19 khan hripui vangin an inah a thi a, a thih hma ni, January 20-ah hripui a vei tih finfiah a ni. Mi pahnihte hi natna dang nei tel an ni.

Zirtawpni zan dar 12 (January 22 zing) khan Lalzuala (73), Khatla East chu SRH-ah a thi a, Covid-19 positive a ni tih January 10 khan hmuh chhuah niin, SRH-ah enkawl nghal a ni.

January 22, Inrinni zing dar 9:15 khan Vankhumi (84), Hmunhmelṭha, Champhai district chu hripui vangin an inah a thi a; Covid-19 vei a ni tih January 18 khan hmuh chhuah niin, an inah an inenkawl a ni. Inrinni vek zan dar 9:50 khan Chalmawia (101), Saitual Chawnpui Veng pawh hripui vangin Saitual CCC-ah a thi a; Covid-19 positive a ni tih January 15, 2022 khan hmuh chhuah a ni tih sorkar thuchhuakin a tarlang.