Councillor Christina-i'n ruihhlo a hâl

Armed Veng South VDP-te'n ruihhlo chi hrang hrang an mante chu January 22, Inrinni zing khan an veng community hall bulah bialtu councillor Christina Roluahpuii Sailo-in a hâl ral.

Christina Roluahpuii chuan, "Ka ṭhalaipui leh rual u zawkte tibuai a, chhungkaw tam tak tibuaitu ruihhlo hi kan en liam mai a nih chuan kan khawtlang hi chênna tlak a ni dawn si lo. Hlawh leh fak pawh beisei loa rim taka zan mú pawh tuah thei lo kan VDP-te zarah mi tam tak thlamuang takin kan mu thei a, in hnathawh hi a ropui tak zet," a ti.

VDP-te'n sawiselna an tawh ngei a rin thu sawiin Councillor chuan, "Thil tisual lo tan VDP-te hi an hnawk lo a, min vengtu an ni zawk. Tuna kan hâl tur ruihhlote hi man lo ula mi tam tak chhiatna thlentu, chhungkaw tam tak rûm phahna a ni ngei ang," a ti a, VDP-te chu thâ thla loa ṭan la zel turin a chah.

Ruihhlo hâl takte chu Armed Veng South VDP-te'n kum 2021 chhunga an man a ni a, cheng nuai 3.4 chuang hû a ni.