Hmunphiaha royalty Rs 7 lâk tum an dem ; Royalty Re 1-ah tihhniam a nia sawi a ni

Serlui Joint Farmer chuan January 22, 2022 khan thuchhuah siamin, hmunphiah an tharte man man zawka hralh an tum laiin, sorkarin kg. khatah royalty (chhiah) Rs 7 zel lâk a tum chu hriatthiam har an tih thu an puang.

Hetih lai hian, Vairengte Hmunphiah Collector Association chuan, Mizoram sorkarin mimal huana hmunphiah hralh aṭanga royalty kg. khatah Rs 7 lak tura tih tawh, bialtu MLA Lalrinsanga Ralte hmalakna avanga Re 1-a tihhniam a ni chu lawmawm an tih thu an tarlang.

Serlui Joint Farmer chuan, hmunphiah aṭanga royalty kg. khatah Rs 7 sorkarin lak a tum chu ṭha lo an tih thu tarlangin, "Kan hmunphiah tharte hi kg. khatah Rs 30 aia sánga hralh theih loh tur min siamsak leh hi kan duh lo tak zet. Kan thlai tharte hi a lei to ngam bertu hnenah zalên taka kan hralh theih nan sorkarin ruahmanna siam thuai turin kan phût tlat a ni," an ti a; sorkarin hmunphiah mahal sak a tum leh chhiah a tihpun chungchang chu January 19, 2022 khan Kolasib DC hnenah an thlen thu an sawi.

Hetih lai hian, Vairengte Hmunphiah Collector Association chuan January 19, 2022 khan Serlui bialtu MLA Lalrinsanga Ralte hnenah lehkha thawnin, Vairengtea mimal huana hmunphiah tharte Mizoram sorkar (EFCC department)-in mahal a tum leh royalty kg, khatah Rs 7 zel lak an tum hnua a hmalakna avanga mahal loa an hralh thei tur leh royalty Re 1 chauh lak tura tih a ni leh chu an lawm thu an hrilh.

Vairengte Hmunphiah Collector Association tarlan danin, mimal huana hmunphiah tharah royalty Rs 7 lak tura tih tawh chu Re 1-ah tihhniam a ni a, chumi chungchangah chuan January 18, 2022 khan Kolasib DFO-in order a tichhuak. Hmunphiah kg. khata Re. 1 zel lak tura tih chu royalty ni loin, administrative charge niin an tarlang bawk.