Covid-19 chhut chah dan tur sawiho

Lunglei DC Kulothungan A hoin January 21, Zirtawpni khan sorkar hotute'n Covid-19 darh mek chhut chah dan tur an sawiho a; January 1-21, 2022 chhungin Lunglei district-ah hripui vei 1,101 hmuh chhuah a nih thu leh a pun zel thu tarlan a ni.

Ṭhutkhawma tarlan danin, kumin January 1-21 chhung khan Lunglei district-ah hripui vei 1,101 hmuh chhuah a ni a; hripui lèn tirh aṭangin Lunglei district-ah swab sample 1,25,954 endik tawh aṭangin positive 13,199 (10.48%) hmuh a ni tawh a, hripui vangin mi 32 thi tawhin, mi 12,417 (94.08%) enkawl dam an ni tawh.

Lunglei district-ah hian Covid-19 vaccine pek tura chhût mi 1,12,647 aṭangin mi 1,08,222 (96.1%)-in dose khatna an la tawh a, mi 86,238 (76.6%)-in dose hnihna an la tawh bawk.

Ṭhutkhawmah hian, kum 15-17 inkarte Covid-19 vaccine pekah School Education department nen ṭang kawpa hmalak chhunzawm zel ni se, an ti a; an district-a sikul tin dinhmun la khawm tur leh a ṭul anga sikula kal chilha vaccine pe turin Health department leh School Education department aiawhte an ruat. January 28, 2022-ah village task force hruaitute nen inràwnkhawm an rél bawk.