January thlaah hripui vei 17,989 hmu tawh

Mizoramah Covid-19 vei January 21, Zirtawpni khan mi 1,116 leh January 22, Inrinni khan mi 1,285 hmuh chhuah a ni. January thla chhungin mi 17,989 hmuh a ni tawh a, chawhrualin ni tin mi 817.68 hmuh chhuah ang a ni. Inrinni leh nimin khan hripui vei dam tawh mi 1,917 chhuahtir an ni a, hripui vangin mi pathum an thi.

Covid-19 vei January 21-a hmuh tharte chu mipa 479 leh hmeichhia 637 an ni a, RT-PCR hmanga hmuh 68, TrueNAT hmanga hmuh 32, RAT hmanga hmuh 995 leh FIA hmanga hmuh 21 a ni. Positivity rate chu 19.35% a ni a, mi 995 zinga mi 720-in symptom neiin, mi 396-in an nei lo.

January 22-a hripui vei hmuh tharte chu mipa 559 leh hmeichhia 726 an ni a, RT-PCR hmanga hmuh 149, TrueNAT hmanga hmuh 26, RAT hmanga hmuh 1,095 leh FIA hmanga hmuh 15 an ni. Positivity rate chu 22.49% a ni a, mi 1,285 zinga 849-in symptom an nei.

IPR tarlan danin, January 21-a Covid-19 positive 20 aia tam hmuhna khua/veng panga a awm a, Saichalah 75, Ngopaah 55, Thenzawlah 22, Oxford HSS, Electric Vengah 28 leh Mission Vengthlangah 27 hmuh a ni. Lengpui Airport-ah state páwn aṭanga rawn lut zingah Covid-19 positive mi 20 hmuh a ni a, screening point dang - Vairengteah mi 15, Kanhmunah 13 leh Tuivaiah mi paruk hmuh a ni bawk.

January 22-a Covid-19 positive 20 aia tam hmuhna khua/veng paruk a awm a, Ngopaah 128, Saichalah 54, Zotuitlangah 49, Mission Vengah 24, Kulikawnah 21 leh Armed Vengah 20 hmuh a ni. Lengpui Airport-ah state páwn aṭanga rawn lut zingah Covid-19 positive mi 12 hmuh a ni a, screening point dang - Vairengteah mi 17, Kanhmunah 11 leh Tuivaiah mi 10 hmuh a ni.

Nimin tlai dar 5 thleng khan hripui vei dam tawh mi 872 chhuahtir an ni a, Inrinni khan mi 1,045 chhuahtir an ni bawk.

IDSP record angin, Mizoramah Covid-19 vei 1,59,653 hmuh chhuah a ni tawh a, mipa 76,303 leh hmeichhia 83,350 an ni a, mipa aiin hmeichhia 7,047-in an tam zawk. Nimin tlai dar 5 thleng khan mi 1,50,099 (94.02%) chhuahtir an ni tawh a, mi 581 (0.36%) thi tawhin, enkawl mek mi 8,973 (5.62%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,59,653 chu mi 1,000 zelah hripui vei mi 145 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 22, 2021 thlenga swab sample endik tawh 16,20,287 aṭanga RT-PCR hmanga endik zat percentage chu 20.83 a ni a, RAT hmanga endik zat chu 73.39% a tling.