MLPC Act hman zel a ni dawn em tih Sorkarin a ngaihtuah a mek - CM

Chief minister Lal Thanhawla chuan, Mizoram Liquor (Prohibition & Control) Act, 2014 chu hman zel a nih dawn leh dawn loh ngaihtuah mek a nih thu a sawi a, "MLPC Act hi inthlahrung takin kan hmang a ni," a ti.

Nimin khan Congress Bhavan-ah thu sawiin Chief Minister chuan, mi tam takin zu chungchangah sorkar beih an tum tih a sawi a, "Kum 1997-ah kohhran ngenna avangin zu khap bur a ni. A hlawhtlin ring vak lo chungin, kohhran kan zah avangin kan khap a ni. A chhan chu zu hi hmun dangah pawh an khap hlawhtling ngai lo," a ti a; zu vangin America pawhin an danpui an tidanglam niin a sawi.

Lal Thanhawla chuan, zu khap burna a hlawhchham avangin, tih dan ṭha zawk an zawng nia sawiin, "Tuna zu zawrh phalna kan pek chhuah chhan chu, tih dan ṭha zawk i'n zawng chhin teh ang tih vang a ni. House-ah pawh inthlahrung takin 'A ṭha lo zawk a nih chuan kan titawp leh mai ang' kan ti a ni. Zu khap burna dan hlawhchhamzia chu a hretu vek kan ni ang," a ti.

Zu khap bur a nih laiin sorkarin theihtawp a chhuah nia sawiin CM Hawla chuan, "Zu vanga man, pawisa chawitir leh tàntir tam tak an awm. Mahse, sorkarin ṭanpuitu a nei loin kan hria. Zu khap bur lai khan kohhranin eng nge a tih ka ngaihtuah ṭhin a, ka vui lek lek ṭhin. Thawk khat lai phei kha chu YMA lamin ṭan la lo se a buaithlak khawp ang," a ti a; zu chungchangah ṭanrual a ṭul thu a sawi.

Lal Thanhawla chuan, MLPC Act kum 2/3 enchhin a nih hnuah inpuhmawhna chhe tak tak a awm thu sawiin Lal Thanhawla chuan, "MLPC Act zirchiangtu tur Committee din a ni a, a thil hmuh chhuah tawha a ṭhat lohna percentage a tam teh chiam lo. A control-tu tur tlem an ti a, MLPC Act kengkawhtu tur tihtam an rawt a, kan hotute'n ngun takin an ngaihtuah," a ti.

Chief Minister chuan, zu khap bur a nih lai khan statistics a awm loh thu sawiin, "He hi thil buaithlak tak a ni. Zu vanga man leh táng zat vel chu zawn chhuahtir mek a ni. Vengtu tih tam nge, zu zawrh tihtawp ngaihtuah mek a ni a, sorkar chuan a ṭha ber tur a ngaihtuah," a ti a; Excise & Narcotics department-ah staff duh ang zat inlak belh theih a nih loh pawhin, police lam pawhpên dante an ngaihtuah mek niin a sawi.

CM Lal Thanhawla chuan, Congress sorkarin zu a zuar lo nia sawiin, "A zuar duhte zawrh phalna a pe a, a in duh an tam a, chu'ng mite hnenah lei phalna a pe leh mai a ni. Inthlahrung takin, dan ṭha tak hnuaiah kan kalpui. Eptute'n zu hi min beihna atan hmang mah se, tihsual kan nei lo. A ṭha ber kan tlin lo a, a ṭha ber a awm em tih kan ngaihtuah. Zu hi a ṭha em mai, zuar ang ti an awm lo," a ti.